Тодорхойгүй шалтгаанаар нас барсан лабораторийн ажилтны хэрэг олон нийтийн түгшүүрийг нэмэгдүүлж, эрх баригчдын мэдээллийн ил тод байдалд эргэлзээ төрүүлэв. ОХУ-ын Сибирийн Шелехов хотод тарваган тахлын халдвар тархсан байж болзошгүй гэх болгоомжлол үүссэн ч оршин суугчид нөхцөл байдлын талаар хангалттай мэдээлэл авч чадахгүй байгаадаа айдаст автжээ. Манай хэвлэлүүд энэ үйл явдлын талаар мэдээлэхдээ "тахал" гэж мэдээлсэн бол барууны хэвлэлүүд "тарваган тахал" гэцгээж байна.
Тус хотод ажиллаж байсан лабораторийн ажилтан гэнэт нас барсан нь олон улсын анхаарлыг татаж, нийгмийн сүлжээгээр янз бүрийн таамаг, цуурхал тархахад хүргэсэн. 28 настай Дарья Шипилова нь Эрхүү хотын Тарваган тахал судлалын хүрээлэнд лабораторийн ажилтнаар ажилладаг байжээ. Тэрбээр аравдугаар сарын 2-нд нас барсан бөгөөд Оросын эрүүл мэндийн байгууллагууд түүний үхлийн шалтгааныг тодорхойгүй гаралтай "уушгины хатгалгаа" гэж мэдээлсэн юм. Харин тарваган тахлаар өвчилсөн байж болзошгүй гэх таамаг албан ёсоор батлагдаагүй байна.
Шелехов хот нь Эрхүү хотоос баруун өмнө зүгт ойролцоогоор 19 километрийн зайд оршдог. Хэрэг явдал ил болсноос хойш хэд хоног өнгөрсөн ч нутгийн иргэд албан ёсны мэдээллээс илүүтэй цахим орчинд тархсан цуурхалд тулгуурлан нөхцөл байдлыг ойлгохыг оролдож байгаагаа CNN-д ярьжээ. Хотын оршин суугч Евгения хэмээх эмэгтэй нөхцөл байдал гаднаасаа хэвийн мэт харагдаж байгаа ч хүмүүс эрх баригчдын мэдэгдэлд төдийлөн итгэхгүй байгааг хэлсэн байна. Харин зарим иргэн халдварын эрсдэлд санаа зовох шаардлагагүй гэж үзэж, амьдралаа хэвийн үргэлжлүүлж байгаа аж.
Эрхүү хотын нэгэн эмийн сангийн ажилтны мэдээлснээр, цуурхал тархсан эхний өдрүүдэд хүмүүс амны хаалт, ариутгалын бодис болон тетрациклин зэрэг антибиотик нөөцлөхөөр олноор иржээ. Гэвч худалдан авалтын давалгаа богино хугацаанд намжсан байна. Оросын Хэрэглэгчийн эрх ашгийг хамгаалах, хүний сайн сайхны төлөөх хяналтын холбооны алба буюу Роспотребнадзор нас барсан ажилтны ойрын хавьтлуудыг хяналтад авч, халдварын эрсдэлийг бууруулах арга хэмжээ хэрэгжүүлжээ. Мөн зарим эмнэлэгт урьдчилан сэргийлэх хязгаарлалт тогтоосон байна.
Гэвч зарим оршин суугчийн ярьснаар, хамгаалалтын хувцас, хийн багтай хүмүүс нас барсан ажилтны амьдарч байсан гэх орон сууцны байранд ирж, ариутгал хийжээ. Дэлхийн эрүүл мэндийн байгууллага Оросын талтай холбогдож, лабораторийн шинжилгээний аргачлал болон ямар үүсгэгчийг шалгасан талаар дэлгэрэнгүй мэдээлэл хүсжээ. Учир нь нас баралтын шалтгааныг эцэслэн тогтоогоогүй нөхцөлд халдварын эрсдэлийг бүрэн үнэлэхэд хүндрэлтэй байгаа аж.
Шипиловагийн ээж Светлана охиноо хараахан оршуулаагүй байгааг орон нутгийн хэвлэлд ярьсан байна. Тэрбээр охиноо хөдөлмөрч, сайхан сэтгэлтэй хүн байсан хэмээн дурсжээ. Энэ хэрэг нь зөвхөн халдварын эрсдэлийн асуудал бус, хямралын үед олон нийтэд мэдээллийг хэрхэн хүргэж байгаа талаарх асуудлыг ч хөндөж байна. Шелеховын зарим оршин суугч амьдрал хэвийн үргэлжилж байгаа гэж үзэж байгаа бол нөгөө хэсэг нь бодит нөхцөл байдлыг бүрэн мэдэх боломжгүй байгаадаа санаа зовниж байна. Оросын эрх баригчид халдварын дэгдэлт болсон гэдгийг батлаагүй бөгөөд нас баралтын шалтгааны талаарх асуултууд олон нийтийн анхаарлын төвд хэвээр байна.
Л.Баяр
