Монгол Улсын Ерөнхий сайд Л.Оюун-Эрдэнэ энэ оны хоёрдугаар сард БНСУ-д  албан ёсны айлчлал хийх үеэр Соёлын сайд Ч.Номин БНСУ-ын Соёл, спорт, аялал жуулчлалын сайд Пак Бу Гёнтой гарын үсэг зурсан. Энэ хүрээнд хөгжмийн салбарт мэргэжилтэн, уран бүтээлчдийг харилцан сургах, солилцох, хамтрын бүтээл туурвих, туршлага солилцох, хоёр улсад зохион байгуулагдах олон улсын урлагийн наадам, симпозимум, семинар болон бусад үйл ажиллагаанд уран бүтээлч, төлөөлөгчдийг харилцан оролцуулах хөтөлбөр хэрэгжүүлнэ гэсэн байдаг.  Тэгвэл гавьяат жүжигчин Т.Ариунаа Солонгосын К поп хамтлаг, дуучдыг монголд урих дээрх шийдвэрийг эсэргүйцэж, санал бодлоо ийн илэрхийлсэн юм. 

Т.Ариунаа: Монгол уран бүтээлчдэдээ хөлс мөнгө өгч чаддаггүй төсөвгүй гэдэг төр засгийн бодлогыг хэрэгжүүлэгч яамдууд маань маань гадны харийн уран бүтээлчдийн тоглолтыг хийж өгнө гэнэ. Энэ цагт дэлхий даяар жижиг улс үндэстэн даяаршлаас хэрхэн ондоошиж өөрсдийн өв соёлоо авч үлдэх вэ? Монгол Улсын тусгаар тогтнол болох 5 тусгаар тогтнолын гол тулах хүч тулгуур нь хэл, соёлын тусгаар тогтнол юм. Залуустаа хэрхэн өвлүүлэх вэ? Хэл соёлын тусгаар тогтнолоо хэрхэн яаж хамгаалж хадгалж, өвлүүлж, үлдээх вэ!!! гэж хичээн зүтгэж яваа, Монголын маань үе үеийн уран бүтээлчид бүтээлч үйлдвэрлэлийг, бор зүрхээрээ гоншигнолгүйгээр, гомдололгүйгээр, ачаагаа үүрч, үүргээ гүйцэтгэсээр ч талбарыг хөгжүүлсээр ч ирсэн, бүтээлч үйлчлэлээ хийсээр хөдөлмөрлөсөөр л одоо ч ажилласаар л байна… Солонгос хамтлаг авчирч, Солонгос К поп наадам хийнэ, хамтлаг дуучдыг нь авчирч тоглуулна гэнэ. Олны танил дуучин өөрөө сурталчилж, яриад дэмжээд зогсож байх юм. Юу гэж ойлгох вэ #Кпоп биш #Монголпоп #Монголдуу, монгол урлаг, монголын залуусын зүрх сэтгэлд сийлэгдэж, хадгалж хамгаалагдан тэд түүчээлэн авч явах ёстой. Өөрсдийн урлаг соёлоо, энэ томоохон талбарын хөгжүүлэлд, яам нь нэг цонхоор ажилладаг үүд хаалга нээгдэх болтугай. Эхлээд өөрсдийн урлагаа өөд нь татацгааяаа Монгол аялгуу, монгол цэвэр яруу тансаг хэл бидний хэдхэн уран бүтээлчдээр, сайхан дуу, аялгуу, бүтээл туурвил нь дуусах вий. Солонгос #Кпоп #Kино, үндэсний хоол бидэнтэй бидэнгүй дэлхийг эзлээд байгаа. Бид ч соёлын колонид ороод удаж байна. Цэрэг дайнаас гадна соёлын эзлэн түрэмгийлэл гэж байдаг юм. Гадны, соёл, хэл, хэлбэр, дүрс, шинж, чанарт, дурлахаар Өөрсдийн үнэт зүйл, үнэ цэнэ ээ мэдэж, алсын хараагаа, ул суурьтай тэнцвэртэй бодлогыг хэрэгжүүлээсэй. Гадны сайханыг харж сурч мэдэж болох ч, туйлширахаас хамгаалж , Өөрсдийн сайхныг харж, хийж бүтээж байгаа бүтээлч, уран бүтээлчдээ, бидний хойч үе болох залуу уран бутээлчидээ төр нь яам нь бодлогоор дэмжиж, ажиллаасай, Монгол хэл, соёл, урлагийн бүх талбар, хамгаалагдаж, хадгалагдаж, хөгжин цэцэглэх болтугай, ерөөж байна. Та бүхэн минь мэргэн ухаандаа тунгаан бодоорой” гэв.