Манай улсын хамгийн эмзэг сэдэв бол эдийн засаг бус элэгдэлд орсон хөрс болоод байна. Хэтэрхий эмзэг экосистемтэй, цөлжилт эрчимтэй явагдаж байгаа энэ цаг үед Монголын хавар хамгийн эмзэглүүлсэн дүр төрхийг бидэнд харуулдаг. Эмзэг хөрсийг эргүүлдэг шар шороон шуурга дан ганц бидний бус дэлхийн анхаарлын төвд байдаг гэдгийг дурдах нь зүйн хэрэг. Ялангуяа Монголын говиос эхэлсэн шар шороон шуурга Өвөр Монголын нутгийг дамжин БНХАУ, БНСУ зэрэг улсуудад хүрдэг байна. Тухайлбал, БНСУ-д хийсэн томилолтын үеэр БНСУ-ын Үндэсний цаг уурын хиймэл дагуулын төвтэй танилцах завшаан тохиосон юм.
Энд мөн л Монголын говиос эхэлдэг шар шороон шуурганы тухай яриа өрнөх нь тэр.
Далай тэнгисийг гатлан очдог шар шороон шуурга БНСУ-ын цаг агаарт ч нөлөөлдөг гэнэ. Тийм ч учраас БНСУ-ын цаг уурын байгууллага Монголын цаг уурын өөрчлөлтийг байнга ажигладаг тухай БНСУ-ын Үндэсний цаг уурын хиймэл дагуулын төвийн мэргэжилтэн хэлж байв. Тэд өөрсдийн хөөргөсөн "JK2A" гэх цаг уурын хиймэл дагуулын тусламжтайгаар цаг уурын маш нарийн мэдээллийг хоёр минут тутамд хүлээн авдаг байна. Тэгвэл тус хиймэл дагуулын радиуст Монголын нутаг дэвсгэр бүхэлдээ багтдаг бөгөөд манай улсын мэдээллийг арван минут тутамд авдаг аж.
Энэ талаар үргэлжлүүлэн БНСУ-ын Үндэсний цаг уурын хиймэл дагуулын төвийн захирал Ким Юн Жэ дараах мэдээллийг өгөв. Тэрбээр "Бид 2019 онд хамгийн сүүлийн үеийн “JК2A” сансрын хиймэл дагуулыг хөөргөсөн. Энэ хиймэл дагуулыг хөөргөснөөс газар хөдлөлтөөс бусад бүхий л байгаль, цаг уурын мэдээллийг урьдчилсан авах боломжтой. Уг хиймэл дагуулын тусламжтайгаар хоёр минут тутмын цаг уурын өөрчлөлтийг харах боломж бүрдсэн. Хиймэл дагуулаас авч буй өндөр нягтшилтай бичлэг дээр үндэслэн энэ жил мод, цэцэг хэдэн сард цэцэглэж байгаа, хаана цөлжилт их явагдаж байгааг харах боломжтой болсон. Монгол Улсын цаг уурын байгууллага манай хиймэл дагуулаас Монгол оронд явагдаж буй цөлжилт, шороон шуурганы тухай хамгийн бодит мэдээллийг авдаг. Цаашид цаг уурын өөрчлөлтийн мэдээллийг авах бүрэн боломжтой гэдгийг хэлмээр байна" гэсэн юм.
Хэдий БНСУ биднээс соёл хөгжлөөрөө хол тасарсан ч бид нэг дэлхий дээр амьдардаг гэдгийг цаг уурын өөрчлөлтүүд харуулдаг болохыг сануулав.
Яг л COP-ын хурал шиг. COP-ын хурал уур амьсгалын өөрчлөлт газар зүйн байршлаас үл хамааран улс үндэстэн бүрд нөлөөлж байдгийг сануулдгаас гадна шийдэх ёстой зүйлүүдийн гарц гаргалгааг хэлэлцдэг гэдгийг уншигч та мэдэх биз ээ. Мөн уг хурлын хүрээнд буурай хөгжилтэй орнуудад үйлдвэржилт хөгжсөн орнууд нөхөн төлбөр буюу мөнгө олгодог. Учир нь дэлхийн цаг уурын өөрчлөлтөд үйлдвэржилт хөгжсөн орнууд асар их нөлөөлдөг байна. Дэлхий хавтгай болсон энэ цаг үед шар шороон шуурга бол Монголын төдийгүй БНСУ, БНХАУ, Японы ч зовлон мөн. Иймд дэлхийн найман тэрбум хүн, улс үндэстэн бүр цаг уурын өөрчлөлтөд анхаарал хандуулах цаг нь болжээ.
Д.Батчулуун
