"Цемент шохой" ТӨХК-ийн гүйцэтгэх захирал Л.Наранбаатар цаг үеийн асуудлаар мэдээлэл өглөө. 

Тэрбээр "Цемент шохой"-н үйлдвэр 405 мянган тонн цемент үйлдвэрлэлээ. Энэ нь 2015 оноос хойших хамгийн дээд, түүхэн үйлдвэрлэл юм. 2015 онд улсаас нэг сая тонн хүчин чадалтай үйлдвэр хэмээн тооцоолж байсан. Үнэн хэрэгтээ энэ үйлдвэр хуучин үйлдвэр болж таарсан. Тухайлбал, БНХАУ-ын хөндлөнгийн аудитын тайланг оруулахад энэ үйлдвэр 400 мянган тонны хүчин чадалтай үйлдвэр болох нь техникийн тайлангаар тогтоогдсон. 2022 оны хувьд манай компани олны шүүмжлэлд өртсөн ч гэсэн байгаа хүчин чадлаараа ажилласан.

Анх удаа 100 тэрбум төгрөгийн борлуулалтын орлогыг 40 жилийн түүхэнд хийлээ. Мөн 30 тэрбум төгрөгийн татварыг улсад төлсөн байна. Тав дахин өндөр татварыг төлсөн. Анх удаа ажилчдынхаа цалингийн фондыг 21 тэрбум болж хоёр дахин нэмэгдүүлсэн. Оны сүүлээр 32 хувиар цалин нэмэхээр төлөвлөж байна. Цэвэр ашгийн хувьд 11,6 тэрбум. Сүүлийн 15 жилд анх удаа бий болсон цэвэр ашиг юм.

Хувьд шилжихээс өмнө 100 сая төгрөгийн ашигтай ажиллаж байсан. Хувьд шилжээд 19 тэрбум төгрөгийн алдагдалтай байсан. Ингэж явсаар 150 тэрбум төгрөгийн хуримтлагдсан алдагдал бий болгочихсон. Дансандаа 400 сая төгрөгийн үлдэгдэлтэй, маш их өртэй үйлдвэрийг хүлээн авсан. Жилийн нэг сая тонны хүчин чадалтай супер үйлдвэрийг хүлээн авлаа гэж ард түмэн ойлгож байсан. Би ч тэгж ойлгож байлаа. Гэтэл шохойн үйлдвэр нь Хөтөлийн хамгийн том асуудал болчихсон. Дулааны станцад шинэчлэл хэрэгтэй байгаа. Мөн уурхайн нөөцийг тоночихсон байсан. Өнөөдөр 2022 онд судалгаандаа мөнгө зарцуулаад шохойн нөөцийг 40 жилээр нэмэгдүүлж чадлаа. Ийм учраас шохойн үйлдвэрийг 100 мянган тонн үйлдвэрлэдэг буюу хэвтээ зуухтай, утаа гаргадаггүй ийм үйлдвэрийг бий болгоно. Ингэснээр Эрдэнэтээс гадна Оюутолгой гэдэг шинэ хэрэглэгчтэй болно” гэв. 

Д.Батчулуун