Шийдвэр гаргах түвшинд жендэрийн тэгш төлөөллийг хангах "АМЛАЛТ" Олон Улсын форум боллоо. Энэ үеэр ЗГХЭГ-ын дарга Д.Амарбасгалан хэлэхдээ, "Эмэгтэйчүүдийн оролцоог дэмжих нь аль нэг улс төрийн намын гэхээс илүүтэйгээр ардчилсан нийгмийн төлөөллийн зарчмыг бүрэн дүүрэн хангахтай шууд холбоотой асуудал. Мөн ардчилал, ардчилсан парламентын засаглал гэдэг бүх талын оролцоог тэгш хангаснаар бодитой бий болдог. МАН, эрх баригч намын хувьд шийдвэр гаргах түвшинд жигд оролцоотой байхад голлон анхаарна. Ойрын ирээдүйд бүрэн хэрэгжиж чадахуйц томоохон бодлого хөтөлбөр гаргаж тавьснаар үүнийг амжилттай хэрэгжүүлж чадна. Өнөөдөр НҮБ-ын хөгжлийн хөтөлбөр, БНСУ-ын хөгжлийн хамтын ажиллагааны байгууллагын зүгээс хамтран  зохион байгуулж байгаа форумд эрх тэгш байдлыг хангах чиглэл дээр санаачилга гаргаж, улс төрийн намын шийдвэр гаргах түвшин дэх эмэгтэйчүүдийн оролцоог 40-өөс доошгүй хувьд хүргэнэ гэсэн зорилтыг тавьж амлалт авч байна. Үүнийг МАН-ын зүгээс бодитой дэмжиж байгаа учир 50/50 хувьд хүргэхэд нэг том алхам хэмээн харж гарын үсэг зурсан.

Түүнчлэн эмэгтэйчүүдийн шийдвэр гаргах түвшинд оролцох оролцоог чанарын түвшинд ахиулах зорилтыг тавьж байгаа. Чанар гэдэг нь чадвартай, мэргэшсэн, олон нийтийн дэмжлэгийг хүлээж авах эмэгтэй улс төрчийг бэлтгэх тухай ойлголт юм. Нэг ёсондоо 2024 оны сонгуульд өнөөдрийн сонгуулийн хуулиар бол 30-аас доошгүй хувь нь эмэгтэй нэр дэвшигч байлаа гэхэд багадаа 25 хувь нь парламентын гишүүн болж орж ирэх чанарыг өсгөх зорилгыг тавьж байгаа.

Мөн өнөөдөр өргөн барьсан төслөөрөө 38 суудал нь мажоритар буюу олонхын, 38 хувь тэнцүүлэх тогтолцоогоор сонгогдож гарч ирэх боломжийг нээсэн. Энэ нь одоогийн 76 гишүүнтэй парламент ахиж бүрдсэн тохиолдолд дөрвөн гишүүн тутмын нэг нь эмэгтэй байна гэсэн үг" гэв.

М.ДЭВЭЭ