"Эрдэнэс Тавантолгой" ХК-ийн БЭТ Ж.Ганбат БЭТ-ийн хугацааг сунгах эсэх асуудалтай холбоотойгоор өнгөрсөн зургаан сарын хугацаанд хийсэн ажил, гарсан үр дүнгийн талаар мэдээлэл өглөө.

Тэрбээр, "Засгийн газраас 2022 оны 10 сарын 26-нд "Эрдэнэс Тавантолгой" ХК дээр онцгой дэглэм тогтоосон. Үүний дагуу бүрэн эрхт төлөөлөгч томилсон. Зургаан сарын хугацаанд 1,3 тэрбум ам.долларын үнэлгээтэй 13 сая тонн нүүрсийг борлуулсан байгаа. 10 сарын 26-наас өнөөдрийг хүртэл 800 орчим сая ам.долларыг оруулж ирсэн. Төмөр замтай холбоотой оффтейк гэрээн дээр 200 гаруй сая ам.долларын өр төлбөрийг төлж гүйцэтгэсэн. Энэ хэмжээгээр Монгол улсын валютын орох урсгал нэмэгдсэн гэж хэлж болно. 2023 оны нэгдүгээр сард 440 сая ам.долларын оруулж ирсэн. Мөн 7,5 сая тонн нүүрс борлуулсан. Энэ нь 795 сая ам.долларын үнэлгээтэй экспорт. Энэ эрчээрээ явбал 30 орчим сая тонн нүүрс борлуулах боломжтой. 13 жилийн түүхтэй "Эрдэнэс Тавантолгой" ХК сайн чанарын нүүрс борлуулж ирсэн. Уурхайн хувьд сул коксжих нүүрсний нөөц их байна. Сорчлохгүйгээр бүгдийг нь зарж борлуулдаг болъё гэсэн зорилго тавьж байгаа. Зорилгын хүрээнд биржээр хоёр удаагийн арилжаа хийж, эрчим хүчний 200 орчим мянган тонн нүүрсийг 70 гаруй ам.доллараар борлуулсан.

Бид бүтээгдэхүүнээ үнэд хүргэх ёстой. Иймээс ч нүүрс "Угаах үйлдвэр"-ийн төсөл хэрэгжиж байгаа. 2024 оны 7 сард ашиглалтад орно. Нэг хоногийн өмнө ч болтугай ашиглалтад оруулахаар ажиллаж байгаа. Нэг жилдээ 10 сая тонн нүүрс угааж, баяжуулах боломжтой үйлдвэр юм.

Ингэснээр 60-80 ам долларын орлого нэмэгдүүлэх боломж бүрдэж байгаа юм. Тэгэхээр бид аль болох ашгийг нэмэгдүүлэх, олборлож байгаа бүх бүтээгдэхүүнээ зардаг болох хэрэгтэй. Түүнчлэн өртөг зардлаа хямдруулах зайлшгүй шаардлага үүсэж байгаа. Баяжуулах үйлдвэр дээр тээврийн зардал өндөр, өөр шинэ систем нэвтрүүлэхийг зорьж байна" гэв. 

М.ДЭВЭЭЖАРГАЛ