Чингэлтэй дүүргийн 19 өрхийн Эрүүл мэндийн төвд 32 нэр төрлийн 82 тоног төхөөрөмжийг Монгол Улсын сайд, нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар гардуулан өглөө. Ингэснээр тус дүүргийн өрхийн эрүүл мэндийн төвүүд наад захын оношлогоо шинжилгээг өөрийн дүүргийн эмнэлэг дээр хийх боломж бүрдэж байна. Мөн тус дүүргийн 14 дүгээр хороонд эрт илрүүлэг, үзлэг оношлогооны төвийг шинээр барьж ирэх онд ашиглалтанд оруулах талаар мэдээллээ. 

-Ж.Сүхбаатар: Дүүргийнхээ Өрхийн эрүүл мэндийн төвийн эмчилгээ оношлогооны чадамжийг сайжруулах хөтөлбөрийг эхлүүлж байна-

Тэрбээр энэ үеэр "Цар тахлын нөхцөлд иргэдэд эрүүл мэндийн тусламж үйлчилгээг хүргэхэд цаг наргүй, хамгийн ачаалалтай ажилласан хүмүүс бол өрхийн эрүүл мэндийн төвүүдэд ажиллаж буй ажилтан алба хаагчид юм. Чингэлтэй дүүргээс сонгогдсон УИХ-ын гишүүний хувьд өрхийн эрүүл мэндийн төвүүдтэй байнга холбоотой ажиллаж байсан. Иймд алба хаагчидтайгаа ярилцаж байгаад өрхийн эрүүл мэндийн төвүүдэд шаардлагатай байгаа тоног төхөөрөмжүүдийг нийтэд нь шийдье, ингэхдээ шаардлагатай байгаа тоног төхөөрөмжийн жагсаалтыг өөрсдөөр нь гаргуулж авсан. 

Өнөөдрийн хувь 32 нэр төрлийн 82 тоног төхөөрөмжийг хүлээлгэн өгч байна. Ингэснээр дүүргийнхээ Өрхийн эрүүл мэндийн төвийн эмчилгээ оношлогооны чадамжийг сайжруулах хөтөлбөрийг эхлүүлж байна.

Эрүүл мэндийн даатгалын хуульд эрүүл мэндийн тусламж үйлчилгээг гүйцэтгэлээр нь санхүүжүүлэх журам хэрэгжиж байгаа. Тэгэхээр өрхийн эрүүл мэндийн төвд тоног төхөөрөмж нь байвал цус, шээсний шинжилгээнээс эхлээд хавдрын шинжилгээг ч авах бүрэн боломжтой гэж харж байна. Хэрэв өрхийн эмнэлэг аль болох 2, 3 дугаар шатлалтын эмнэлгийн үйлчилгээг үзүүлдэг, олон төрлийн нарийн шинжилгээг авч чаддаг бааз суурьтай болбол гүйцэтгэлээрээ санхүүжилтээ авах боломжтой. Тиймээс дүүрэг, хороодынхоо зорилтод бүлгийн иргэдэдээ энэхүү тоног төхөөрөмжийнхөө ид шидийг үзүүлж, тэднийгээ эмчилгээ үйлчилгээ саадгүй авахад нь туслаарай. Төрийн үйлчилгээг авч чаддаггүй иргэд гэр хорооллоор бишгүй бий. Энэ иргэдээ үзэх өдөр, цагийг харамгүй гаргаж, эрүүл мэндийн тусламж үйлчилгээ авч чаддаггүй иргэдээ хамруулаарай" гэв. 

-С.Одчимэг: Өрхийн эмнэлгүүд тоног төхөөрөмжийн хувьд чадавхжих нь олон иргэнд хүрч ажиллах боломж бүрдэж байна-

Чингэлтэй дүүргийн 10-р хорооны ӨЭМТ-ийн дарга С.Одчимэг сэтгэгдлээ хуваалцлаа. 

Тэрбээр "Биохимийн аппарат, хамгийн сүүлийн үеийн үзүүлэлттэй зөөврийн эхо аппарат зэрэг тоног төхөөрөмжийг хүлээн авч байна. Манай өрхийн эрүүл мэндийн байгуулагдаад 20 гаруй жилийн нүүрийг үзэж байна. Энэ хугацаанд өрхийн эмнэлэг дээр биохимийн шинжилгээ хийх нь бүү хэл шээсний шинжилгээ ч хийх боломжгүй байсан. Өрхийн эмнэлгүүд ийнхүү өдрөөс өдөрт хөгжсөөр байна. Өрхийн эмнэлгүүд тоног төхөөрөмжийн хувьд чадавхжих нь олон иргэнд хүрч ажиллах боломж бүрдэж байна" гэв. 

-Г.Анхбаяр: Өрхийн ЭМТ-үүдэд шаардлагатай тоног төхөөрөмжүүдийг гардуулж байгаа нь бидний үйл ажиллагаанд ахиц, дэвшил гаргахуйц чухал хөрөнгө оруулалт юм-

Мөн энэ үеэр ЧД-ийн 14-р хорооны ӨЭМТ-ийн дарга Г.Анхбаяр сэтгэгдлээ хуваалцлаа. 

Тэрбээр "Манай хороо 6461 хүн амтай. Эмнэлгийн хувьд тоног төхөөрөмж тал дээр дутмаг байсан. Хамгийн хэцүү асуудал нь ард иргэдээ 2, 3 дугаар шатлалын эмнэлэг рүү явуулж таардаг. Өрхийн эрүүл мэндийн төвүүдэд шаардлагатай тоног төхөөрөмжүүдийг гардуулж байгаа нь бидний үйл ажиллагаанд ахиц, дэвшил гаргахуйц чухал хөрөнгө оруулалт болж байна. Тухайлбал, биохимийн бүрэн аппарат, анализатор, сэргээн засах физик эмчилгээний тоног төхөөрөмжүүдийг олгож байгаа. Мөн цус, шээсний шинжилгээний аппарат, зөөврийн эхо өгсөн байна. Зөөврийн эхоны хувьд шаардлагатай тохиолдолд иргэдэд үйлчлэхдээ гэрээр нь авч очоод үйлчлэх боломж бүрдэж байна" гэв. 

Д.Батчулуун