Багагүй шүүмжлэл дагуулаад байгаа “KFCLand-Аз жаргалын хотхон” төслийн талаар Үндэсний цэцэрлэгт хүрээлэнгийн ОНӨТҮГ-ын дарга Ү.Оюунзултай ярилцлаа.

-“KFCLand-Аз жаргалын хотхон” төсөл хэрэгжиж эхлээд, дуусах хугацааны талаар мэдээлэл өгөөч?

-“Таван богд” групптэй тус төслийг хэрэгжүүлэхээр гэрээлэхдээ “Үндэсний цэцэрлэгт хүрээлэн”-гийн ерөнхий төлөвлөгөө, тохижилтын даалгаврыг үндэслэн Монгол Улсад мөрдөгдөж буй хууль, тогтоомж, дүрэм журмыг мөрдсөн. Мөн барилга байгууламж, хөшөө дурсгал барихгүй, үйлчилгээ явуулахгүй байх зэрэг харилцааг бүрэн зохицуулж, гүйцэтгэлийн ажлыг 2023 оны 04 сарын 01-нд эхлүүлж, 2023 оны 05 сарын 20-ны өдөр дуусгахаар ажиллаж байна. Манай талаас арчилгаа, хамгааллыг нь хариуцаж, нийслэлийн өмчид хүлээлгэж өгнө.

-Үндэсний цэцэрлэгт хүрээлэн дотор “KFC Land аз жаргалын хотхон” гэсэн нэртэй талбай байх нь хэр тохиромжтой вэ гэх зэргээр нэрнээсээ эхлээд л маргаан дагуулж байна. Энэ тал дээр та ямар байр суурьтай байна вэ?

-Тухайн төслийн нэршлийг “Таван богд” групп сонгосон шүү дээ. Тиймээс олон нийт шүүмжлэлтэй хандаж байгаа. Ийм ч учраас бид тус байгууллагад саналаа илэрхийлнэ.

-Үндэсний цэцэрлэгт хүрээлэнгээс өөр бүтээн байгуулалт хийх газар олдоогүй юм болов уу, хаана ч очсон хүмүүс байж л байгаа шүү дээ. Уг төслийн үр дүн, үнэ цэн, ач холбогдлыг юу гэж харж байгаа вэ? 

-Цар тахлаас үүдэн “Үндэсний цэцэрлэгт хүрээлэн”-г зорих хүний тоо тав дахин өсөж, хүйтний улиралд өдөрт 5-9 мянга, дулааны улиралд өдөрт 10-15 мянга орчим иргэн амарч зугаалж байна. Үүнийг дагаад ая тухтай амрах орчин бий болгох хэрэгцээ шаардлага бий болсон. Энэ бол алхаж байгаа хүн амраад суух сандалтай, хөгжлийн бэрхшээлтэй иргэндээ ээлтэй, хүүхэд залуучууд, ахмадууддаа тохирсон орчин нөхцөлтэй аялал, амралтын бүстэй болох төсөл.

Хүрээлэнд ирж байгаа хүүхэд, залуус зөвхөн урагшаа хараад алхаад л байхыг хүсдэггүй байх. Тэдэнд тоглож наадах, спортоор хичээллэх сонирхол байгаа шүү дээ.

Ийм бодит хэрэгцээ шаардлагын дагуу 2018 оноос эхлэн хүсэлтээ тавьсан “Таванбогд” группын 1,1 га талбайд хүүхдийн тоглоом, залуучуудын спорт, урлагийн орчин, хөгжлийн бэрхшээлтэй иргэн, ахмад настан, гэр бүлээрээ амрах нөхцлийг бүрдүүлэх зорилготой 2,5 тэрбумын хөрөнгө оруулалт хийх санаачилгыг хүлээн авсан юм.

Тухайн  тохижилтын даалгавартай газрын бүтээн байгуулалтын ажил улс, нийслэлийн төсвөөс хөрөнгө оруулалт нь шийдэгдэхгүй 10 гаран жил болсон.

Тиймээс “Таван богд” группын талтай (KFC) удаан хугацаанд зөвшилцсөний үндсэн дээр энэхүү ажлыг эхлүүлсэн. Төсөвт хүлэгдэхгүйгээр, харин хувийн компаниудын нийгмийн төлөө хувь нэмэр оруулах гэсэн урам зоригийг хугалах вий гэхээс бид болгоомжилж байгаа.

2,5 тэрбумын хөрөнгө оруулалт хийж буйн хувьд "KFC" гэрэлтдэг самбар тавья

гэсэн санал гаргасан

-Эсрэгээрээ тохижилт нэрийн дор хийж байгаа томоохон сурталчилгаа (зарын самбар) болж байгаа юм биш үү?

-Нөгөө талаас 2,5 тэрбум төгрөгийн хөрөнгө оруулалт хийж буйн хувьд "KFC" гэсэн бичиг бүхий улаан өнгөтэй, гэрэлтдэг самбар тавья гэсэн санал гаргасан. Харин зураг төсөлд орсон уул бол 6-8 метр өндөртэй гулсуур. Гэхдээ түүнийг Монгол орны нэгэн хайрхны зураг талаас нь харсан. Гэвч олон нийт дургүйцэж байгаа учраас нэр болон бусад зүйлсийн тухайд өөрсдийн санал, бодлоо илэрхийлэх болно.

-Олон байгууллагатай хамтарч ажилладаг, тохижилт хийж өгдөг гэсэн шүү дээ. Тэдгээр байгууллага нь тусдаа KFC шиг нэрээрээ бүхэл бүтэн талбайг хаягласан байдаг уу?

-Цэцэрлэгт хүрээлэн байгуулах талаар яригдаж эхэлсэн үеэс одоог хүртэл гадаад, дотоодын болон төр, төрийн бус 30 гаруй байгууллага хөрөнгө оруулж, тохижилт, ногоон байгууламж хийж хамтран ажиллажээ. Дотоодын хөрөнгө оруулалтаар  2010 онд ЦЕГ-ын “Цагдаа талбай”, 2014 онд “Шри Чинмойн талбай”, 2016 он ХХЕГ-аас “Сүлдэт багана талбай”, 2017 онд “JCI талбай”, 2018 он МХБХ-ны “Дайчин чанар, тэсвэрийн талбай” байгуулсан. Гадаадын хөрөнгө оруулалтаар 2013 онд Сөүл хотын захиргаа “Сөүлийн талбай”, 2018 он БНХАУ-ын “Миний ботаник гарден” хийгдсэн зэргийг дурьдаж болно.

-Ногоон бүтээн байгуулалт гээд байгаа боловч загвар зургийг нь харахад цемент л харагдаад байна гэж шүүмжлэх нь байсан. 1.1 га талбайн хэдэн хувьд нь ногоон байгууламж байх юм бол?

-“Үндэсний цэцэрлэгт хүрээлэн” байгуулах тухай 2009 оны оны анхны тогтоолоор нийт  талбайг 1280 га газартайгаар баталсан. Гэтэл 2014 онд 973 га болгон багасгаж, 183 га газарт тохижилт, ногоон байгууламж хийх ерөнхий төлөвлөгөө баталсан байдаг.

Ерөнхий төлөвлөгөөний дагуу талбайн 85 хувьд нь ногоон байгууламж, 15 хувьд нь тохижилт бүтээн байгуулалт хийх ёстой. Одоогоор 183 га талбайн 85 хувьд нь ногоон байгууламж, 5 хувьд нь тохижилт, бүтээн байгуулалт хийсэн байна. Ингээд тохижилтын даалгавартай газар буюу 1,1 га талбайн 0,6 га-д нь тохижилт, 0,5 га-д нь усжуулалтын систем бүхий ногоон байгууламж хийх зураг төсөл гарсан.

-Та хэлэхдээ, “Байгаль орчны тухай хууль, Үндэсний цэцэрлэгт хүрээлэнгийн дүрэм журмын дагуу л ажиллана” гэж байгаа. Тэгвэл Үндэсний цэцэрлэгт хүрээлэнгийн яг ямар дүрэм журмынх нь  дагуу ажиллах юм бол?

-“Үндэсний цэцэрлэгт хүрээлэн”-гийн ОНӨТҮГ нь байгууллагын дүрэм журамтай. Мөн нийслэлийн иргэдийн ундны усны эх үүсвэр бүхий улсын тусгай хамгаалалттай газар. Ийм нөхцөлд мөрдөгддөг Монгол улсын бүх хуулийг мөрдлөг болгоно гэсэн үг.

-2014 оноос хойш гэхээр “Таван богд” группын төслийн мөнгө бүрдэхийг 9 жил хүлээсэн байна гэж ойлгож болох уу. Энэ хугацаанд өөр газраас тохижуулах, төсөл хэрэгжүүлэх талаар яриагүй юу?

-Дээр дурьдсанчлан 183 га талбайн 15 хувьд нь тохижилт хийгдэх даалгавартай, үүний 5 хувьд нь улс, нийслэлийн төсөв болон, гадаад дотоодын хөрөнгө оруулалтаар тохижилт хийгдэж байна. Тухайн төсөлтэй адил санал олон ирдэг. Гэвч хөрөнгөө босгоод, санхүүжилтээ шийдээд ороод ирэх боломжтой газрууд цөөхөн байдаг. “Таван богд” группийн хувьд олон жил санал солилцож, төлөвлөж, хөрөнгөө босгож чадсан учраас давуу тал болсон юм.

-Энэ төслөөс гадна цаашид Үндэсний цэцэрлэгт хүрээлэнд ямар бүтээн байгуулалт, өөрчлөлтүүд хийгдэх вэ?

-Бид үйл ажиллагааны үндсэн зорилго, ерөнхий төлөвлөлтөө эвдэхгүйгээр ногоон байгууламж бүтээх мод тарих тал руу илүү анхаарч ажиллана. Түүнээс гадна “Үндэсний цэцэрлэгт хүрээлэн”-д 2009-2020 он хүртэлх 11 жилд 110 мянган мод тарьсан. 2021 оноос хойших сүүлийн 2 жилд 50 мянган мод цэцэрлэгжүүлэлтийн хэлбэрээр тарьсан байна. Энэ нь мэргэжлийн инженер, техникч, цэцэрлэгчдийн гар, сэтгэл зүтгэл нийлсэн хамтын үр дүн, “Үндэсний цэцэрлэгт хүрээлэн”-гийн бүх цаг үеийн дээд амжилт, ерөнхийлөгчийн санаачилсан “Тэрбум мод” үндэсний хөдөлгөөний эерэг сайн тусгал юм. Одоо 160 мянган модоо 98,5 хувийн амьдралтай ургуулж байна.

М.Дэвээжаргал