НЗДТГ, Улаанбаатар хотын худалдааны танхимтай хамтран жил бүр зохион байгуулдаг "Улаанбаатар ОУ-ын хөрөнгө оруулалт, түншлэлийн форум-2023" Яармаг дахь Хангарьд ордонд болж байна.
2015 оноос хойш зохион байгуулагдаж буй эл форум "Шинэ сэргэлт-Улаанбаатар" уриатайгаар явагдаж байгаа ба гадаад, дотоодын 400 орчим төлөөлөгч оролцож байна. Хөрөнгө оруулалт, түншлэлийн форум нь нийслэл хотод тулгамдаж байгаа асуудлыг шийдвэрлэхэд чиглэсэн томоохон бүтээн байгуулалтад гадаад дотоодын хөрөнгө оруулалтыг татах, төр хувийн хэвшлийн түншлэлийг хангах зорилготойгоороо онцлог юм.
Форумын нээлтийн үеэр НИТХ-ын дарга Ж.Батбаясгалан "Эдийн засагт үзүүлсэн цар тахлын сөрөг нөлөөллийг бууруулахаар Алсын хараа-2050 урт хугацааны хөгжлийн бодлогыг үр дүнтэй хэрэгжүүлэх, төрийн бүтээмжийг сайжруулах зорилгоор шинэ сэргэлтийн бодлогыг хэрэгжүүлж байна. Энэхүү бодлогын баримт бичгийн нэг цөм нь хот, хөдөөгийн сэргэлт юм. Хот, хөдөөгийн сэргэлт нь төр хувийн хэвшлийн түншлэл, хөрөнгө оруулагчдийн идэвхтэй оролцоо, хамтын ажиллагаанд тулгуурлсан эдийн засгийн сэргэлтээр хөгжлийг авч ирнэ. Тиймээс бид өнөөдөр хамтдаа нийслэлийн хөгжлийн бодлоготой уялдсан томоохон төсөл хөтөлбөр, эдийн засгийн үр өгөөжтэй бизнесийн саналуудаа хөрөнгө оруулагчид, түншүүд ,хотуудын төлөөлөл, баялаг бүтээгчид болон нийт нийслэлчүүддээ танилцуулах нь уг арга хэмжээний гол зорилго. Санал дүгнэлт хамтран байгуулсан санамж бичиг, гэрээ хэлэлцээрүүд цаасан дээр үлдэх бус төсөл хөтөлбөр болон хэрэгжих ёстой" гэлээ.
М.Дэвээжаргал
