Манай улс “Алсын хараа-2050” урт хугацааны хөгжлийн бодлогыг хэрэгжүүлж байгаа билээ. Тэгвэл “Шинэ сэргэлт-Улаанбаатар” уриатай гадаад, дотоодын 400 гаруй хөрөнгө оруулагч, баялаг бүтээгч оролцсон “Улаанбаатар-хөрөнгө оруулалт түншлэлийн форум” болж өнгөрсөн юм. Улаанбаатар хотод тулгамдаж байгаа асуудлыг шийдвэрлэхэд чиглэсэн гадаад дотоодын хөрөнгө оруулалтыг татах, төр хувийн хэвшлийн түншлэлийг хангах зорилготой эл форумын үеэр нийслэл хотод тулгамдсан байгаль орчин, дэд бүтцийн асуудлыг шийдэх, бүтээн байгуулалтад хувийн хэвшилтэй хамтын ажиллагаагаа өргөжүүлэх зэрэг чиглэлийн 14 санамж бичиг, гурван гэрээ үзэглэж, 50 орчим төслийг танилцуулсан арга хэмжээ боллоо.
Төрөөс “Хот, хөдөөгийн сэргэлт”-д онцгой анхааран ажиллаж байгаагаа онцлон дурдаж байв. Чухам цар тахлын үеэр хямарсан улсын эдийн засаг, хөгжлийн дархлаа нь хөрөнгө оруулалт татах, бүтээн байгуулах замаар сэргэнэ гэх утга агуулгыг илэрхийлсэн, шинийг санаачлагч, ашиг хонжоо гэхээс илүү нэг ёсондоо нийгмийн сайн сайханд хувь нэмрээ оруулж байгаа бизнес эрхлэгчдийн төртэй уулзах уулзвар, төрөөс асуух цэг, төрөөс хариулт авах боломж энэ байлаа.
2023 оны форумын онцлог бол дөрвөн танхимд, дөрвөн өөр үйл явдал өрнөж байсан нь юм. Тодруулбал, нэг давхарт үндсэн тайз буюу хэлэлцүүлэг, гол бүтээн байгуулалтын төсөл хөтөлбөрийг танилцуулж байхад “Инновацийн төв”, “Рitch” танхим руу үндсэн тайзны хэлэлцүүлгийг шууд дамжуулж, өөр нэг талд нь шинэ санал санаачлагаа хэлэлцэн төслөө танилцуулах явц үргэлжилж байх жишээтэй. Харин дөрвөн давхарт “Пресс центр” байх ба тухайн хэсэгт хэвлэл мэдээллээр дамжуулан олон нийтэд хүргэх хамтын ажиллагаа, гэрээ хэлэлцээрүүдийн талаарх мэдээлэл өгч байлаа.
Олон хөлийн бужигнаан, дугуй ширээ тойрсон бизнес яриа, хийж буй ажлаа танилцуулахдаа нүд нь гялалзах үндэсний баялаг бүтээгчид, хамтрагчаа олох баярт үйл явдлууд, хөрөнгө оруулагчийн сэтгэлийг татсан бизнес санаанууд тэнд хөвөрсөн юм.
Үүнээс гадна орчуулагчдын баг толгой өндийлгөх завгүй дуун хөрвүүлж, хаа нэг шилэн цонхны цаанаас нүд гүйлгэж харагдана. Гадна нь зогсож буй хүнд энэ хэсэг яармаг дахь Хангарьд ордны хамгийн нам гүм орчин юм шиг үзэгдэх хэрнээ тэр өрөөн дотор дуу чимээний мөргөлдөөн үүсэж байгаагаас гарцаагүй санагдана.
ДҮҮЖИН ТЭЭВЭР, ГЭР ХОРООЛЛЫН ДАХИН ТӨЛӨВЛӨЛТТЭЙ 2024 ОНЫ УЛААНБААТАР
Форумын үеэр томоохон бүтээн байгуулалтын ажлыг эхлүүлэх хөрөнгө оруулагч, түншүүдийн хоорондын уулзалт болсноороо онцлог. Тухайлбал Францын “Пома” компанитай дүүжин тээврийн хоёрдугаар шугмын бүтээн байгуулалтын ажлыг эхлүүлэх санамж бичигт гарын үсэг зурсан юм. Их хотын иргэдийн “толгойны өвчин” болсон түгжрэлийг бууруулахад дүүжин гүүр ихээхэн ач холбогдолтой байх талаар талууд дурдлаа.
Тэгвэл “Пома” группын хяналтын зөвлөлийн ерөнхийлөгч Жон Сочэл хэлэхдээ, “Өнөөдрийн санамж бичгийн гол агуулга нь 2020 онд Монгол-Франц улсын хооронд зурагдсан санхүүжилтийн гэрээ буюу ЗГ-ын зээлийн хүрээнд Улаанбаатар хотын нийтийн тээвэрт дүүжин тээврийг нэвтрүүлэх төсөлд хамтран ажиллах санамж бичигт гарын үсэг зурж, баталгаажууллаа. Улаанбаатар хотын түгжрэлийг бууруулахад тодорхой хувь нэмэр оруулах энэ шугамыг дэлхийн 80 гаруй хотод дүүжин тээвэр нэвтрүүлсэн туршлагатай Пома групп хамтран гүйцэтгэнэ. 2024 онд дүүжин тээвэр ашиглалтад орж, нийслэлийн иргэд үзэсгэлэнт Богд уул, өөрийн хотоо дээрээс нь тольдон зорчих болно” гэсэн юм.
Түгжрэлээс гадна Улаанбаатар хотын тулгамдсан нэг гол асуудал бол агаарын бохирдол юм. Гэр хорооллыг дахин төлөвлөх замаар тулгамдаад буй хөрсний бохирдол, агаарын бохирдлыг шийдэх гарцыг эрэлхийлж байна.
Жишээ нь Сонгинохайрхан дүүргийн 34 дүгээр хорооны нутаг дэвсгэрт байрлах Баянголын аманд 1764 айлын орон сууц барих төслийн хүрээнд батламж гардуулсан юм. Түүнчлэн НОСК-аас МИК холдингтой гэр хорооллын дахин төлөвлөлтийн асуудалд хөрөнгө оруулалтын чиглэлээр хамтран ажиллах санал санамж бичигт гарын үсэг зурж баталгаажууллаа.
Улаанбаатар- хөрөнгө оруулалт, түншлэлийн форум нь баялаг бүтээгч, хөрөнгө оруулагч, төр хувийн хэвлийг хооронд нь холбох гүүр болж буйн хувьд хүмүүс өөрсдийн төслийн онцлог, ач холбогдлыг танилцуулсан.
Энэ нь нэг талаар форумын зохион байгуулагч, нийслэлийн өмчит “Улаанбаатар хөрөнгө оруулалт, менежмент ҮЦК”-ийн тандалт судалгаанд орж байна гэсэн үг юм.
Тухайн компани нь нийслэлийн хөгжлийн сан, гарааны бизнесийг дэмжих сан, нийслэлийн ногоон сан, эрсдлийн удирдлагын санг итгэмжлэн удирддаг тул хөрөнгө оруулалт татах боломжтой төслүүд, эргээд хөрөнгө оруулалт хийх төслүүдийг судлах зорилготой байгаагаа илэрхийлж байлаа. Өнөөдрийн төслийн танилцуулгаар хэд хэдэн компанитай хамтын ажиллагааны гэрээ байгуулахаар болсон байна. Мөн ногоон төслүүд нь тэдний сонирхлыг ихэд татаж байгаа гэсэн юм.
үргэлжлэл бий...
М.Дэвээжаргал
