Монгол улсын соёлын элч О.Оюунтуяагаас ирэх долоон сард зохион байгуулагдах "NordArt-MonArt" олон улсын уран баримлын симпозиумын талаар тодрууллаа.
-"NordArt"-тай хамтран хэчнээн уран бүтээлчийн баримлыг үзэсгэлэнд дэлгэв ээ?
-Манай улс "NordArt" олон улсын дүрслэх урлагийн үзэсгэлэнтэй 2014 онд хамтын ажиллагааны гэрээ байгуулсан. Өнгөрсөн жил 18 уран бүтээлчийн 59 бүтээлийг 1500 мкв талбайд дэлгэн танилцуулжээ. Биднийг сүүлийн хоёр жилийн хугацаанд Соёлын яамнаас дэмжин ажиллаж байгаа. Энэ есөн жилийн хугацаанд Монгол улсын дөрвөн удаагийн бие даасан павильон тусгай үзэсгэлэнг гаргаад байгаа юм. Ингэснээр нийт 120 монгол уран бүтээлчийн 350-иад уран бүтээлийг европын урлагийн зах зээлд гаргасан байна.
Дэлхийд "NordArt" нь заавал очиж үзэх ёстой олон улсын чанартай үзэсгэлэнгийн эхний аравт багтдаг юм. 2022 оны 6 сараас 10 сар хүртэлх хугацаанд нийтдээ 120 мянган хүн энэхүү симпозиумыг үзсэн байдаг. Монгол улсаас уран барималч А.Очирболдын "Ухамсар" бүтээл 2015 онд буюу хамгийн анх толилуулагдаж байсан.
Тэр үедээ үзэгчдийн нэрэмжит шагналыг хүртэж байсан бол 2019 онд "Дэгрээ" бүтээлээрээ гранпри шагналыг хүртсэн. Бидний хамтын ажиллагаа тогтвортой үргэлжилсээр байна.
-Хамтын ажиллагааныхаа хүрээнд цаашид ямар зүйл хийх төлөвлөгөөтэй байна вэ?
-Монгол улсын уран бүтээлчдээ хөгжүүлэх, дэлхийн урлагийн салбарт өөрийн гэсэн байр сууриа олохын төлөө хамтран ажилладаг. "NordArt"-ын уран бүтээлчдийг улсдаа урьж, зохион байгуулах байсан ч цар тахлын улмаас хойшилсон байлаа. Энэ жилийн 7 сарын 28-наас 8 сарын 21-ны хооронд есөн орны 10 уран бүтээлч оролцсон олон улсын уран баримлын симпозиумыг “Монголд зочлох жил”-ийн хүрээнд зохион байгуулах гэж байна. Уран бүтээлчид маань манай улсын байгалийн материалаар (боржин чулуу гэх мэт) бүтээлээ туурвина. Бүтээл туурвих явцад тухайн уран бүтээлчид маань иргэдтэй харьцаатай байх буюу олон нийтийн нээлттэй орон зайд 8 сарын 24-нөөс 9 сарын 30-ны хооронд гадна болон дотор их хотын баримлууд, хот тохижилтод нөлөөлөхөөр зохион байгуулахын тулд зорин ажиллаж байгаа.
-"NordArt-MonArt" симпозиумыг зохион байгуулахын ач холбогдлыг юу гэж харж байна вэ?
-Энэхүү уран баримлын симпозиумыг ирэх жилээс хамтын ажиллагааны 10 жилийн ой, монгол улсын тав дахь удаагийн павильон учир, мөн Монгол-Германы дипломат харилцаа тогтоосны 50 жилийн ойг угтаж томоохон хэмжээнд зохион байгуулна. Түүнчлэн гурван жил тутамд уран бүтээлчдийг урьж энэ бүхнийг хийснээр соёлын аялал жуулчлал хөгжинө.
Энэ жил гэхэд дунджаар 4,2 тэрбумын хөрөнгө оруулалтыг улсдаа оруулна гэсэн тооцоо бий.
Жил болгон өргөжин тэлсээр 8-10 тэрбум төгрөг соёлын аялал жуулчлалаар дамжин орж ирнэ. Оролцох уран бүтээлчдийн хувьд дэлхийд чулуун баримал нь доод тал нь 250, 560 сая төгрөгөөр үнэлэгддэг хүмүүс юм.
М.ДЭВЭЭЖАРГАЛ
