Төрийн ордонг тойруулан шинээр хашаа босгосон нь олны дургүйцлийг хүргэлээ. Өмнөх хашаагаа шинэчлэх нэрийдлээр бетон болгон өөрчилсөнд таагүй хандаж байна. Тэдний нэг нь Монголын худалдаа аж үйлдвэрийн танхимын ерөнхийлөгч О.Амартүвшин юм. Тэрбээр ЗГ үнэхээр реформ хийх чин эрмэлзэлтэй байгаа юм бол эхлээд энэ хашааг хэн хэдэн төгрөгөөр хийсэн талаар мэдээлэлийг ил болго. Нөгөө талаас үүнийг хийсэн компани нь мөн хэнд хэдэн төгрөг өгөөд үүнийг хийх эрхийг авснаа ил болгочих” гэв.

Асуух ёстой асуулт мөн. Гэхдээ энэ хашааны үнэ өртөг, хэн хийсэн нь сонин биш, төрийн ордны хашааг шинэчлэх шаардлага байсан уу гэх асуулт иргэдийн дунд байна. Өнгө үзэмж улам гутаана. Зарим нөлөө бүхий эрхэм хашаа, хайс, хаалтыг буулгах ажлыг эхлүүлж, хэл амтай хэдэн хашаа хайсыг лав буулгасан. Тэрхүү аяныг иргэд талархан дэмжинэ билээ.

Хэд хэдэн газрын хашаа хайсыг буулгаж, иргэд тав тухыг утгаараа мэдэрч байна. Гэтэл зарим мэдэлтэн төрийн ордныхоо хашааг бэхжүүлдэг нь сонин. Нийслэлээс зохион явуулсан аяны эсрэг. Уялдаа алга. Өнгөрсөн өвөл болсон жагсаалын үеэр иргэд төрийн ордныхоо хашааны зарим хэсгийг эвдэж сүйтгэсэн.

Бас давж орсон нь үнэн. Тэглээ гээд хашаагаа бэхжүүлж байгаа бол бас эндүүрч. Иргэдээ бухимдуулахаа л больчих. Бухимдсан монголчууд хоёр метр ногоон хашаа байтугай 20 метр цагаан хэрмийг ч төвөггүй давсан түүхтэй билээ.