Монгол Улсад телевизийн салбар үүсэж хөгжсөний болон Монголын Үндэсний Олон Нийтийн Телевиз үүсэн байгуулагдсаны түүхт 56 жилийн ой өнөөдөр тохиож байна. Монголын үндэсний телевизийн анхны эфир 1967 оны есдүгээр сарын 27-нд цацагдаж байсан бол 1981 онд анхны өнгөт нэвтрүүлгээ бэлтгэн гаргаж байв.
Улмаар 1991 онд Монголын Үндэсний телевиз Азиасат системээр анх удаа нэвтрүүлэг цацах боломжтой болж, телевизүүдийн нэвтрүүлгүүдийг Монгол орны алслагдсан бүс нутаг хязгаарт хүргэх, хилийн чанадад нэвтрүүлгээ цацах боломжоор хангагдсан юм. Аливаа мэдээллийн хэрэгсэл улс орны өнцөг булан бүрт болж байгаа үйл явдал болон дэлхий нийтэд олны анхаарал татсан мэдээллийг үзэгч олонд шуурхай, үнэн бодитой хүргэх эрхэм зорилготой билээ. Харин энэ үүрэг, эрхэм зорилгоо хэрхэн биелүүлж байгаагаас мэдээллийн хэрэгслийн нэр хүнд шалтгаалдаг. Урьд нь телевизийн нийтлэл нэвтрүүлгийн талаар өрсөлдөгч гэж байхгүй, зөвхөн ганцхан телевизээ үздэг байсан цаг хэдийн өнгөрч үзэгчид өөрийн гэсэн үзэх сувагтай, тогтмол үздэг мэдээ, мэдээллийн хөтөлбөртэй болжээ.
Монголчууд бид тусгаар тогтнолоо сэргээн тунхагласан 1911 он, Ардын хувьсгал ялсан 1921 он, Монгол хүн сансарт ниссэн 1981 оны түүхэн үйл явдлуудыг тодхон санадаг шиг Монгол оронд Телевиз үүсэн байгуулагдсан өдрийг ч баяр хөөр, дурсамж дүүрэн тэмдэглэн өнгөрүүлдэг билээ.
Эрхэм үзэгч та бүхэнд болон Монгол Улсын ууган телевизийн үе үеийн уран бүтээлчид, ажилтнууд, инженер техникчид, телевизийн салбарын нийт уран бүтээлчдэдээ баярын мэнд хүргэе.
