"Баавгай болохсон" УСК маргааш буюу нэгдүгээр сарын 12-ны өдрөөс кино театруудын дэлгэцээр гарч эхлэнэ. Үүнтэй холбогдуулан найруулагч П.Золжаргал болон уран бүтээлчид мэдээлэл өглөө.
Найруулагч П.Золжаргал хэлэхдэ, "Баавгай болохсон киноны зохиолын санаа 2017 онд төрсөн. Түүнээс хойш хөрөнгө босгох, зохиолоо хөгжүүлэх урт аяныг туулж, 2022 оны хоёр сард киноны үйл ажиллагаа дуусаж, Каннын кино наадамд шалгарсан. Кино маань 20 гаруй байгууллага, 80 гаруй хувь хүний дэмжлэгтэйгээр бүтсэн. Зураг авалтыг Дэнжийн мянгад хийж, 30 монгол уран бүтээлч оролцсон. Өнгө засалт, дууны найруулга, эвлүүлгийн ажлыг Парис хотод хийсэн. Монгол, Катар, Швейцар, Франц дөрвөн улсын хамтын ажиллагаагаар бүтсэн кино юм.
Энэ бол 15 настай физикийн хичээлд сонирхолтой, асар их энергитэй, сайхан ирээдүйд тэмүүлсэн өсвөр насны хүүгийн тухай кино. Тэр хүүгийн гэр бүлийн түүх, хайр, туулж буй бүхэн одоогийн нийгмийн үнэн бодит байдал. Түүнийг ямар ч хачиргүйгээр, бодит үнэнээр нь зураглан харуулсан.
Хүүхдүүд энэ тийм цаг үед амьдарч байгаагаараа ямар их боломжийг алдаж байгааг болон хүүхдийн эрхийн асуудлыг хөндсөн. Нийгмийн олон давхаргын асуудлыг нэг кинонд багтааж харуулангаа ажилгүйдэл, архидалт, гэр бүл хүүхдийн хүчирхийллийг хөндөж, шийдлийг нь харуулахыг зорьсон.
Боловсрол гэдэг бол хүн болгонд олдохгүй байна. Ядууралд өртсөн айлын хүүхдүүдэд боловсрол бол маш их хичээл зүтгэл гаргасны үндсэн дээр олддог зүйл. Энэ кинонд боловсролын төлөөх хичээл зүтгэлтэй хүүгийн тухай өгүүлнэ. Нийгмийн гашуун сэдвийг хөндөж байгаа ч кино бол хүүхдийн тухай кино. Кинонд маань хүүхдүүд байгаа.
Хүүхэд бол ямар ч нөхцөл байдалд үүрд үлдэнэ гэж боддоггүй хүмүүс. Тэндээс заавал гарна гэж боддог. Энэ бол сайн сайханд хүрнэ гэж итгэдэг гэгээн цайлган оршихуйг харуулсан кино.
Сайн багшийг харуулахыг ч мөн зорьсон. Сайн багш бол хэцүү нөхцөлд байгаа хүүхдийн гэрэл гэгээ, аврал нь. Авьяастай, хичээж байгаа хүүхдийг чиглүүлдэг тийм багш. Сургууль гэдэг хүүхдүүдэд аюулгүй хоргодох газар байх ёстой.
Канн наадам бол кино хийдэг хүн бүрийн мөрөөдөл. "Баавгай болохсон" УСК өчигдөр Франц улсын 100 кино театрт нээлтээ хийсэн. Тэрний урд өдөр Швейцар улсын 27 кино театрт нээлтээ хийсэн. Маргааш эх орондоо нээлтээ хийх гэж байна" гэв.
М.Жаргал
