Хүний өмнөөс ичих ч ёстой лүд юмаа гэдэг үгтэй. УИХ-д өнөөдөр биднийг төлөөлж суугаа зарим гишүүнд энэ үгийг хаяглчихмаар санагдаад байх юм. Гачлантай нь илжигний чихэнд ус хийсэн ч сэгсэрнэ, алт хийсэн ч сэгсэрнэ гэгчээр тэд ойлгохгүй. Тэгсэн хэрнээ хийх юмгүй тэдэнд хийхгүй юм гэж үнэндээ алга. Энд ч гарч ярилцлага өгч, тэнд ч очиж мэдэгдэл хийгээд л... Мэддэггүй ч юм гэж алга, мэдэх юм ч гэж даанч алга.

М.Нарантуяа-Нара гишүүн сая хэвлэлд ярилцлага өгчээ. “Ерөнхий сайд Л.Оюун-Эрдэнэ УИХ-ын гишүүдийн кнопыг худалдаж авахын тулд хоёр триллон төгрөг зарцуулж байгаа сурагтай” гэсэн Ч.Лодойсамбуу гишүүнд ихээхэн эгдүүцэж яваа юм байна. Энэ бол түүний хувийн үзэл бодол, буруутгах гэсэнгүй. Гол нь УИХ-ын гишүүдийг үйл хэргээ явуулахад саад тотгор болж байна гэж дүгнэсэн эрхэм гишүүн М.Нарантуяа-Нара “Улсын төсөв триллон төгрөгт ч хүрээгүй, яамд хэцүүдэж, төсвөө хуваах гээд алалцаж байгаа шүү дээ. Нүүрсний үнэ унаж, сая хэсэг гацлаа. Ийм байхад Ч.Лодойсамбуу үндэслэлгүй ярьж байна. Хаана байна тэр хоёр триллон төгрөг. МСS ч өөрсдөө 350 сая ам.доллароор бонд босгох гээд явж байгаа компани” гэхчлэн ярив. Мөн яамд байгаа хэдхэн их наядаа хуваах гэж алалцаж байгаа тухай хэлсэн байна.

Ердөө хэдхэн минутад урсгасан энэ үгсээс нь л М.Нарантуяа-Нара гишүүний эдийн засгийн ойлголт, боловсролын түвшинг нь шууд харж болохоор байна. Триллон гэдэг тоо ямар утгатай ч тэр мэдэхгүй  явна. Их наяд, триллон хоёр ижил утгатай, Монгол Улсын 2025 оны төсөв 35 их наяд төгрөгт хэдийнэ хүрсэн гэдгийг төсөв баталсан УИХ-ын гишүүн байж мэдэхгүй байгаад л эмзэглэж, санаа зовмоор... Ийм хүмүүс Та бидний өмнөөс шийдвэр гаргаж, Та бидний төлсөн татварыг төсөв нэрээр хувааж, Та бидний амьдралыг шийдвэрлэх хууль, тогтоол баталж байна шүү дээ. Тэд биш, бид дэндүү эмгэнэлтэй...

Хамгийн харамсалтай нь, асуудалд муйхраар ханддаг, шинжлэх ухаанч бус, амандаа орсноо дураар ярьдаг, үгүй юмаа гэхэд бусдын хэлснийг тоть шиг давтдаг, гар хөл нь болчих магадлалтай иймэрхүү УИХ-ын гишүүн Монголын парламентад олон байна. Энд М.Нарантуяа-Нараг ганцааранг нь буруутгаж байгаа юм биш. Ямар ард түмэн байна, тийм төр байдаг гэдэг. Тиймээс л нийгмийн нэг хэсгийн төлөөлөл нь тэд гэж хүлээн зөвшөөрөх ёстой болж байна. 

Өнөөдөр уут махны төлөө тайван жагсаж буй залуусыг эсэргүүцэж байгаа, зангидсан гараа дуртай хүн рүүгээ савчиж  байгаа, парламентыг тараах тухай ам мэдэн уралдан хашгирч буй, хувьсгалд уриалан хөгшчүүдийг турхирч буй хүмүүсийн парламент дахь тусгал нь тэд юм даа. Гэхдээ яалтай ч билээ, тэд бол бидний сонгож явуулсан УИХ-ын гишүүн нь үнэн юм даг. Хүссэнээ яриад, хэн рүүгээ дайрна уу хамаа алга. Эрх нь юм хойно.

             Аминчлан өөрсдөд нь зөвлөхөд “Тэнэг хүний дуугүй нь сүртэй” гэдэг. Аминчлан өөрсдөө сүсэглэхэд, иймэрхүү чадамжтай хүмүүсээс эрүүлээр сэтгэдэг нь энэ парламентад олон байгаасай билээ дээ. “Төрийн минь сүлд өршөө!”

С.Бат