Хүйтний ам наашилж, хотын гудамжинд шинэ жилийн гацуурууд энд тэндгүй гэрэлтэнэ. Энэ үед Б.Даваахүү гэрийнхээ хаалгыг аяархан онгойлголоо. Улаа бутарсан хацар, цасанд гялтганах үс нь түүнийг гадуур хэсээд орж ирснийг илтгэнэ. Гэхдээ түүний инээмсэглэлд нэг л онцгой догдлол ажиглагдана. “Өнөөдөр гэрийнхээ гацуурыг засаад дуусгана гэж бодоод ажлаа ч хурдан амжуулчихлаа” хэмээн тэр инээд алдав. Гэрт нь ороход ширээ дүүрэн өнгөлөг бөмбөлөг, цаасан од, дүүжин чимэглэл харагдана.

 “Гацуурныхаа гэрлийг асаахаар сэтгэл цаанаасаа гэгээлэг болдог" хэмээн тэрбээр ярин суухдаа гацуурны гэрлээ асаалаа.  Яг тэр агшинд өрөө бүхэлдээ гэгээ татаж, өнгө бүхэн амь орсон мэт боллоо. “Энэ гэрэл асах мөч миний хувьд өвлийн хамгийн дулаахан мэдрэмж. Ажил, амьдралын дарамтаас түр холдоод, хүүхэд насны сайхан дурсамжууд л санаанд ордог” гэж тэр хэлэв.

Сэтгэл судлаачдын үздэгээр  шинэ жилийн чимэглэл, ялангуяа гацуурын гэрэл тархины лимбик системд нөлөөлж, дурсамжийг идэвхжүүлэн аз жаргалын даавар ялгаруулдаг аж. Гэрэл, өнгө, баярын уур амьсгал нь стрессийг бууруулж, сэтгэл санааг тайвшруулдаг. Тиймээс хүмүүс өвлийн улиралд илүү эрт гацуур засдаг нь ч үүнтэй холбоотой байдаг байна.

Гацуурын чимэглэл хийхдээ хүмүүс өөрийн өнгө аяс, уран сэтгэмжээ шингээдэг. Энэ нь нэг төрлийн сэтгэл заслын үйл явц болдог гэж сэтгэл судлаачид үздэг. Харин Даваахүү: " гацуураа засаад эхлэнгүүт инээд нь ихсээд байдаг. Энэ өдөр манай найз охиг бид хоёрын хамгийн дуртай өдөр байдаг” хэмээн хөөрхөн өнгөөр ярив

Ийнхүү Даваахүү болон түүний найз охин нэг нэгээрээ чимэглэл өлгөж, өрөө дүүрэн инээд цуурайтаж байлаа. Гацуур мод бол тэдний хувьд жилийн туршид тохиох хамгийн эв нэгдэлтэй мөчийг илэрхийлдэг. Хэдийгээр энгийн нэгэн чимэглэл байсан ч энэ өдрийг тэд хуруу даран хүлээдэг гэж ярин сууна.

 “Шинэ жил бол шинэ эхлэл” Гацуур модны орой дээр тавих том одоо Даваахүү өлгөхдөө хэсэг чимээгүй зогсов. “Энийг өлгөх бүртээ л ‘шинэ эхлэл’ гэж боддог. Өнгөрсөн жил юу ч болсон бай, ирэх жил илүү сайхан байна гэж өөртөө амладаг юм” гэж тэр хэлэв. Сэтгэл судлаачдыг үздэгээр  “Шинэ жил бол хүмүүсийн хувьд сэтгэлзүйн шинэ хуудас. Гацуур засах нь ирээдүйд итгэх, төлөвлөх, өөрийгөө шинэчлэх бэлгэдэл болдог” байна.

Ийнхүү гацуураа засаж дууссан Даваахүүгийхээс гарахад гадаа хүйтэн салхи салхилж байв. Харин гэрийнх нь цонхоор анивчих өнгөлөг гэрэл гудамжийг чимж, хажуугаар өнгөрөх хэн бүхэнд дулаан мэдрэмж төрүүлэх нь дамжиггүй. Гацуур модны доор өнгөрүүлсэн энэ хэдхэн цаг хэн нэгний хувьд жирийн өдөр байж болох ч олон хүний сэтгэл дэх гэрэл, дулаан, итгэлийн эх үүсвэр болж чаддаг нь илт. Шинэ жилийн гацуур засах нь зүгээр нэг уламжлал биш. Энэ бол гэр бүлийг ойртуулж, сэтгэлийг эдгээж, дурсамжийг дулаацуулдаг жижигхэн ид шид юм.