Италийн Сицили арлын Мессина хотын музейгээс Сэргэн мандалтын үеийн нэрт зураач Антонелло да Мессинад хамаарах дөрвөн урлагийн бүтээлийг хулгайлжээ. Хулгай наймдугаар сарын 15-ны орой Италийн үндэсний баярын өдөр болох Феррагосто-гийн үеэр Мессина хотод олон нийтийн арга хэмжээ үргэлжилж байх үед гарсан байна. Хулгайчид музейн хамгаалалтын дохиолол болон бусад системийг тойрч гарсан бөгөөд хэрхэн нэвтэрсэн талаар цагдаагийн байгууллага мөрдөн шалгаж эхэлжээ.
Хулгайд өртсөн бүтээлүүдийн гурав нь 1473 онд бүтээгдсэн “Сан Грегорио” полиптихийн таван үлдсэн хэсгийн гурав нь юм. Мөн Мариа болон Христийг дүрсэлсэн хоёр талт жижиг зураг алдагджээ. Уг бүтээлүүдийг 15 дугаар зууны Сэргэн мандалтын үеийн Сицилийн нэрт зураач Антонелло да Мессинагийн бүтээл гэж үздэг.
Анх хулгайчид полиптихийн бүх таван хэсгийг авч явсан боловч зугтах үедээ хоёр бүтээлийг орхисон байна. Ийнхүү нийт дөрвөн бүтээл одоогоор алга болоод байгаа юм.
Хулгайлагдсан бүтээлүүдийн нийт үнэлгээг 70–80 сая евро орчим гэж мэдээлж байгаа ч мэргэжилтнүүдийн үзэж байгаагаар эдгээрийн үнэ цэнэ зөвхөн мөнгөн дүнгээр хэмжигдэх боломжгүй, Сицилийн түүх, соёлын өвийн хувьд онцгой ач холбогдолтой аж.
Ялангуяа “Сан Грегорио” полиптих нь Мессина хоттой салшгүй холбоотой бүтээл юм. Тус бүтээл 1908 онд хотыг сүйрээсэн хүчтэй газар хөдлөлтийг даван үлдсэн бөгөөд өнөөг хүртэл Мессинад хадгалагдаж байсан юм.
Италийн эрх баригчид уг хэргийг урьдчилан төлөвлөсөн, захиалгат хулгай байж болзошгүй гэж үзэж байна. Учир нь ийм алдартай бүтээлүүдийг хууль ёсны зах зээл дээр шууд худалдах бараг боломжгүй бөгөөд хар захын зохион байгуулалттай сүлжээ эсвэл тодорхой захиалагчтай холбоотой байж болзошгүй гэж мөрдөгчид таамаглажээ. Мессина хотын музей мөрдөн шалгах ажиллагааны үеэр хаагдсан бөгөөд Италийн Соёлын яам бүтээлүүдийг яаралтай олж, сэргээн авчрахыг шаарджээ.
Л.Баяр
