Оросын тэргүүн баян, цагаач улс төрч Борис Березовскийн үхэл дэлхийн нийтийн анхаарлын төвд байна. Энэ сарын 23-ны өдөр амиа алдсан нь тогтоогдсон Березовскийн хэргийн чухал явдлуудыг тоймлон хүргэе.

    Оросын тэргүүн баян, цагаач улс төрч Борис Березовскийн үхэл дэлхийн нийтийн анхаарлын төвд байна. Энэ сарын 23-ны өдөр амиа алдсан нь тогтоогдсон Березовскийн хэргийн чухал явдлуудыг тоймлон хүргэе.

Цогцсын задлан шинжилгээ: 2003 оноос Англид цагаачлан амьдрах болсон Борис Березовскийн цогцос өнгөрсөн бямба гарагт гэрийнх нь угаалгын өрөөнөөс олдсон билээ. ОХУ-ын Ерөнхийлөгч Путины дайсан гэгдэх түүний цогцост шүүх эмнэлгийнхэн задлан шинжилгээ хийж байгаа. Даваа гарагт Березовскийг дүүжлэгдэж амиа алдсан байж болохыг, өчигдөр түүний хавирга хугарсан байсныг эмч нар мэдээлсэн. Харин Борис Березовскийг хүзүүндээ олстойгоор олсон тухай мөрдөн байцаагч Марк Биссель мэдэгдсэн нь шуугиан тарьж байна. Ямартаа ч шинжилгээний дүн бүрэн гартал хэргийн шүүх хурал хийгдэхгүй аж.

Үхэхээс өмнө: Энэ үеэр бас нэгэн явдал хэвлэлүүдийн анхаарлыг татжээ. Талийгаачийн Владимир Путинд бичсэн захидлыг нэрээ нууцалсан этгээд интернэтэд цацсан юм. Энэхүү захидлыг бүрэн эхээр нь хүргэе.

«Владимир Владимирович! Ноён ерөнхийлөгч!
Нэн ялангуяа улс төрд хамаатай үгийн үнэ цэнэ, дурсамжийн үнийг  тантай хамт бид хоёр сайн мэднэ. Би өөрийн алдааг ил тодоор хүлээхэд бэлэн түүгээр ч барахгүй одоо түүнийг энэ захидалдаа хүлээн зөвшөөрч байна. Миний хийж, хэлж байсан зүйлээс олон нь зөвтгөх аргагүй, хатуу буруутгал хүлээх ёстой. Гэхдээ, Владимир Владимирович!  Би 68 настай өвгөн. Хөөгдмөл байдлаар 12 жил амьдарлаа. Миний буурал үс, Эх орноосоо таслагдан шаналсан минь миний гэмийг нимгэлээгүй гэж үү?

Владимир Владимирович, надад таныг итгээсэй гэж би үнэнч шударгаар гуйж байна. Би эхний өдрөөсөө л Оросыг санаж ирлээ. Харьд өнгөрөөсөн өдөр бүрээр миний саналт улам бүр гүнзгийрч бэтгэрч ирлээ. Тийм ээ, би еврей, гэхдээ Орост төрсөн. Би орос хүн шүү, Владимир Владимирович. Би өөр хүн байхад баяртай л байх байсан. Тэгвэл би ингэж шаналахгүй байсан байх. Гэхдээ би Орос хүн. Оросоос таслагдсан минь намайг алж байна.

Хорлонд сохорсон үедээ хийж байсан үйлдэл үгийг минь өршөөхийг танаас гуйя, Владимир Владимирович минь. Өнөөдөр би бүхнийг ухаарч, дахин ингэж хэзээ ч хийхгүй болсныг Бурхан харж байгаа.

Оросдоо, эх орондоо эргэн очихыг би маш ихээр хүсч байна. Би газар шороон дээрээ үхмээр байна. Энэ бол хоосон үг бишээ, Владимир Владимирович.

Би, мөнхийн жүүд шиг газар дэлхийгээр тэнж явахаас ядарлаа.
Ноён ерөнхийлөгч өө, надад эргэн очихыг зөвшөөрөөч.
Таныг  гуйя. Мөргөн гуйя.
Таныг гүнээ хүндэтгэсэн,Борис Березовский» гэжээ.

ОХУ-ын ерөнхийлөгч асан Борис Ельциний үед тэрбээр улс төрийн гол тоглогчдын нэг байсан бөгөөд В.Путины үед бусад улс төрчдөд үзэл бодлынхоо хувьд хавчигдах болсон байна. Түүнийг 2001 онд мөнгө угаасан хэргээр хуулийнхан баривчлах гэсэн ч тэрбээр Англид улс төрийн орогнол хүсч, хилийн чанадад амьдрах болжээ.