Энэ сарын эхээр Хятадын улсын өмчит үйлдвэр газрын тосны цооног гаргаж авахаар Вьетнамын далайд хайгуул явуулсанаас үүдсэн тэмцэл үргэлжилж байна. Энэ нь хоёр улсын хооронд газар нутгийн маргаан өрнүүлдэг Өмнөд Хятадын тэнгисийн асуудлыг сэдрээгээд байгаа билээ. Вьетнамд өрнөж буй бослого хөдөлгөөнд оролцсон 200 орчим хүнийг ямар ч шалтгаангүйгээр баривчилсан ажээ. Гэсэн ч Хятадын түрэмгийллийг эсэргүүцсэн босогчид тэмцлээ үргэлжлүүлж, Вьетнамын өмнөд хэсэгт орших гадаадын өмчит 15 үйлдвэрт гал тавьжээ. Мөн Бинг Дуонг мужид 20 мянган ажилтан жагсаал хийж, эвдлэн сүйтгэх ажиллагаа явуулсан байна. Босогчид ийнхүү Вьетнамын аж үйлдвэрийн төвүүдийг сүйтгэсэн нь гадаадын хөрөнгө оруулагчдыг үргээх вий гэсэн айдсыг бий болгожээ. Энэ хооронд Хятадын үйлдвэртэй андууран Тайванийн компани халдлагад өртсөнтэй холбоотойгоор Тайвань, Вьетнамын дээд хэмжээний уулзалт зохион байгуулсан байна. Сингапур, Япон улсууд мөн дээд хэмжээний уулзалт зохион байгуулахаар товлов.