Цагдаа, хуулийн байгууллагын ажилтнуудын хууль бус үйлдэл, жирийн иргэдийг хэлмэгдүүлж байгааг эсэргүүцсэн иргэд өнгөрсөн сард хэвлэлийнхэнд хандсан.

Тэгвэл иргэн Б.Саранцэцэг, Б.Цэндсүрэн нар өнөөдөр дахин мэдээлэл хийлээ.

Тэдний хөвгүүд болох Л.Мөнгөнбаяр, Ш.Жамъянсүрэн нарыг 2013 оны есдүгээр сарын 3-4-нд шилжих шөнө цагдаагийн ажилтан мөрдөн байцаагч Молор-Эрдэнэд  халдаж, дээрэмдэхийг завдсан гэсэн үндэслэлээр эрүүгийн хэрэг үүсгэн сэжигтэнээр татжээ.

Энэ хэргийн анхан шатны шүүх хурал өнгөрсөн оны арваннэгдүгээр сард болж, шүүгдэгч хөвгүүд цагдаад зодуулсан, мөрдөн байцаагч Балдорж нь бичиг үсэг огт мэдэхгүй хүнийг өмгөөлөгчгүйгээр байцааж, мэдүүлэг авахдаа хүч хэрэглэхээр заналхийлсэн, хохирлоо төлчихвөл хэрэг дуусна зэргээр хуурч мэхэлсэн гэж шүүх үзээд нэмэлт мөрдөн байцаалтад буцаасан байна.

Энэ үед УЕП-ын дэргэдэх Мөрдөн байцаах алба татан буугдаж, цагдаагийн ажилтнуудтай холбоотой хэргийг Цагдаагийн хэлтсийн ахлах мөрдөн байцаагч нь шалгах журмын дагуу Баянзүрх дүүргийн Цагдаагийн I хэлтсийн ахлах мөрдөн байцаагч шалгах болжээ. Гэсэн ч энэ хэрэгт Л.Мөнгөнбаяр, Ш.Жамъянсүрэн нарыг буруутган, улмаар өнгөрсөн 4 сарын 7-нд цагдан хорьсон байна.

Одоогоор тэдний хөвгүүд хэрэг хийгээгүй хэмээн өлсгөлөн зарласан бөгөөд хүүхдүүдээ эргэхээр очиход нь “Хүүхдүүд чинь тэртээ тэргүй өлсгөлөн зарлаж байгаа юм чинь эргэж очиж хоол өгөх хэрэг байгаа юм уу” гэхчилэн доог тохуу хийн тавладаг гэнэ. Мөн тэд олон өмгөөлөгчид хандсан ч “Цагдаа, прокурор нийлсэн хэрэг дээр ажиллахгүй” хэмээн цааргалдаг аж.

Энэ үеэр тэд цагдаа прокурорын буруутай үйл ажиллагаанаас болж хохирсон, хохирч буй иргэдтэй нийлж холбоо байгуулах гэж буйгаа мэдэгдээд хууль зүйн сайдыг энэ асуудалд анхаарлаа хандуулахыг хүссэн юм.