Ерөнхий сайд Н.Алтанхуяг баасан гарагт яам агентлагийн удирдлагуудтай “Хариуцлага, хяналт, хэрэгжилт” цахим хурал хийх үеэрээ АТГ-ыг ширүүхэн шүүмжлэв. Тэрбээр “Сүүлийн үед хээл хахууль, авлига гэдэг үгэн дээр болгоомжтой ханддаг болоод байгаа. Ноднингоос хойш манай Засгийн газар хэрэг хийгээгүй хүнийг шоронд хийх тухай биш, хээл хахууль авлигыг устгах чиглэлээр “Яаж зөв суурьтай үндэслэлтэй ажил хийх вэ” гэдэг асуудалд анхаарч нэлээд олон ажлуудыг хийсэн байгаа. Гарсан зөрчил дутагдалтай ч тэмцсэн. Энэ агуулгаараа төрийн байгууллагуудад дохио, сигнал очсон. Энэ чиглэлээр бодолтой, бодлоготой ажиллаж байгаа гэж ойлгодог. Харамсалтай нь сүүлийн үед АТГ үүнийг хийж, хэрэгжүүлэхдээ хүмүүсийг айлгадаг компанит ажил болгож хувиргасан учраас Ерөнхий сайдын хувьд энэ үгийг хэлэхдээ болгоомжилдог болчихоод байгаа. Үүнээс гадна Төр засгийн үйл ажиллагаанд АТГ учруулж байгаа нэг хохирол байгаа нь хүмүүсийн томилгоонд эрээ цээргүй оролцдог болсон явдал. Ийм асуудлыг бид тэвчихгүй хэлж байгаа. Үүнийг өөрчлөнө. Ер нь ардчилсан нийгэм гэдэг бол хариуцлагын тогтолцоог зөв хувиарлаж байхаас гадна нэг нэгнийгээ хянадаг тогтолцоотой байх ёстой. Гэтэл прокурорын хяналтыг тийш нь авчихлаа. Олон юмыг нэг доор бөөгнүүлэхээр сөрөг үр дагавар гарч байгаа юм. АТГ-т бизнес эрхэлж байгаа хүмүүсийг шууд барьж аваад сэгсрээд шоронд хийгээд байх шаардлага төдийлөн байхгүй. Энэ мэтээр алдаа дутагдал анзаарагдаж байна. Үүнийг цаашид өөрчлөх шаардлагатай.

Бид сар бүр Төрийн нарийн бичгийн дарга нар, агентлагийн дарга нар, аймгийн удирдлагуудтай цахим хурал хийдэг. Төрийн нарийн бичгийн дарга нартай уулзалт хийх үеэр хөндлөнгийн нөлөө ямар байгаа талаар асуухад “Үйл ажиллагаа явуулахад хөндлөнгийн дарамт шахалт үнэхээр маш их бий болсон” гэж байсан. Энэ бол цаад агуулгаараа шинэчлэл өөрчлөлт явсаар байгаад цөөн хүмүүсийн дураараа дургидаг тэр цэг дээр очсон гэсэн үг. Хэдэн хүүхдүүдээ аятайхан амьдруулах, улс орноо гайгүй болгох гэсэн зорилтоос нэг их айж сандраад байх юм байггүй ээ. Энэ асуудал дээр хэдүүлээ хүч чадлаа нэгтгээд Монголын нийгмийг эрүүл болгох, бизнесийн орчныг сайжруулах олон чиглэлийн ажлаа хийгээд явна” гэсэн юм.