Булган аймгийн нутаг дэвсгэрт гэмт хэргээс урьдчилан сэргийлэх ажлын үр дүнг дээшлүүлэх, Байгаль орчны эсрэг гэмт хэрэг, Малын хулгайн гэмт хэрэг, Хөдөлгөөний аюулгүй байдлын ашиглалтын журмын эсрэг гэмт хэрэг зөрчлөөс урьдчилан сэргийлэх, техник технологийн дэвшлийг хөдөө орон нутагт нэвтрүүлэх “Цахим цагдаа” хөтөлбөрийг хэрэгжүүлэх зорилгоор Цагдаагийн газраас санаачлан Байгаль орчны сангийн хөрөнгө оруулалтаар 350,400,000 төгрөг шийдвэрлүүлж Хутаг-Өндөр сумын Сэлэнгэ мөрний “Гурт”-ын гүүр, Баян-Агт сумын “Хануй” голын гүүр, Хялганат тосгоны “Сэлэнгэ” мөрний гүүр, Орхон сумын “Орхон” голын гүүрэн гарцууд дээр теле-хяналтын камер суурилуулах ажлыг эхлүүлж гүйцэтгэлийг “Монкабель системс” ХХК нь хийж гүйцэтгэн өнөөдөр Орхон голын гүүрэн дээрх теле камерыг хүлээлгэн өгөх арга хэмжээ боллоо.
Нээлтийн ажиллагаанд аймгийн Засаг дарга Д.Эрдэнэбат, ИТХ-ын дарга Д.Батсайхан, Цагдаагийн газрын дарга, Цагдаагийн хурандаа О.Ганбат, Орхон сумын засаг дарга Оюун болон сумын иргэд оролцов. Цагдаагийн газрын дарга, Цагдаагийн хурандаа О.Ганбат уг арга хэмжээг нээж хэлсэн үгэндээ Булган аймаг байгалийн давуу тал олонтой түүний нэг нь томоохон гол, мөрөн манай аймгаар дайран өнгөрдөг нь дурын этгээд хүссэн газараар гол мөрөн гатлаад байхгүй хад асга хавцал, ангалаар хашигдаж байгаа нь гүүрэн гарцыг камержуулах хэрэгцээ шаардлагыг бий болгосон. Эдгээр гүүрэн гарцыг камержуулсанаар Булган аймгийн төдийгүй Архангай, Хөвсгөл, Завхан чиглэлийн авто тээврийн хэрэгслийн хөдөлгөөн, хууль бус үйл ажиллагааг хянах, теле-камерийн системд холбогдсоноор тодорхой төрлийн гэмт хэргээс урьдчилан сэргийлэх чухал ач холбогдолтой хөрөнгө оруулалт болсоныг онцоллоо.