2011 оны тод 100 аж ахуйн нэгжийг эрэмблэхэд “Орифлэйм Монгол” ХХК 49-д жагсчээ. Хатагтай Гомбосүрэнгийн Оюунгэрэлийн удирддаг энэ компани Шведийн гоо сайхны бүтээгдхүүний борлуулалтын сүлжээ бөгөөд бүхний мэдэх “Алтай холдинг”, “Цаст импекс”, “Хөтөлийн цемент шохой” компаниуд, “Монос”,  “Бридж” групп зэрэг Монголын бизнесийн томчуудыг ардаа орхисон байх юм.

  2011 оны топ 100 аж ахуйн нэгжийг эрэмблэхэд “Орифлэйм Монгол” ХХК 49-д жагсчээ. Хатагтай Гомбосүрэнгийн Оюунгэрэлийн удирддаг энэ компани Шведийн гоо сайхны бүтээгдхүүний борлуулалтын сүлжээ бөгөөд бүхний мэдэх “Алтай холдинг”, “Цаст импекс”, “Хөтөлийн цемент шохой” компаниуд, “Монос”,  “Бридж” групп зэрэг Монголын бизнесийн томчуудыг ардаа орхисон байх юм.

  2000 онд БНН-аас, харин өнгөрсөн зун МАХН-аас УИХ-д нэр дэвшиж үзсэн Г.Оюунгэрэл захирал харин ойрын үед лааны хомсдол, монгол гэрийн үнийн өсөлтөд нөлөөлсөн цочирдом мэдэгдлийн эзэн болоод байна. 12 дугаар сарын 21 гэхэд галав юүлж, дэлхий шинэ эзэдтэй болох тухай алд дэлэм санаа алдсан ярилцлагууд нь шинжлэх ухаан, эрүүл сэтгэлгээ гэдэг зүйлээс дэндүү хол байдаг олон хүний даралтыг ихэсгэх боллоо.  Түүний анхааруулж байгаачлан дэлхий сөнөх юм гэж үү? Гадаадад байгаа хүүхдүүдээ дуудаж, лаа, хүнсээ базаах уу? Харанхуй олныг үймрүүлж буй “гэгээрсэн” хатагтай юу яриад явна вэ?

  Олонх айл будаатай цайгаа ууж, амралтын өдрөө аятайхан эхлүүлж байсан бямба гарагийн өглөө хатагтай Г.Оюунгэрэл UBS телевизээр дэлхийн мөхлийн тухай цаг шахам хуучиллаа. “Цай юу, кофе юу?” нэртэй ярилцлагыг үзсэн хүмүүсийн хувьд тулгамдсан асуулт “Үлдэх үү, үхэх үү?” болж орхив. “Олон монгол хүний хүүрийг хармааргүй байна” гэж тэрээр ярилцлагаа эхлэлээ. Ингээд эрүүл хүний санаанд багтаж ороход тун төвөгтэй түүний төлөг мэргэ, оюун дүгнэлтүүдээс түүвэрлэн сийрүүлье. Ярилцлагын туршид Г.Оюунгэрэл гуайн хоолой сааралтан, хүндээр санаа алдан, асар их түшгүүр, гунихралын байдалтай байв.
 
  -Цаг маш бага үлдсэн. Ердөө 83 хоног. Гэгээрсэн, хар муу санаагүй, сайхан хүмүүс л Алтан бумбын эринийг хамтдаа угтах болно.

 -Далай тэнгисийн ус 90 хэм босч ирээд хуурай газар руу асгарна. Энэ Япон, Гонконг, Сингапур алга болно. Европт л гээд байгаа юм, их хүйтэн мөсөн тив үүснэ.

-80 цаг харанхуй нөмөрнө. Цахилгаан, холбоо, гар утас, тээвэр юу ч ажиллахгүй. Соронзон туйл өөрчлөгдөхөөр наадуул чинь ажиллахгүй. Бас од гарагийн парад болно.

  -Дэлхийн соронзон туйл өөрчлөгдөж, асар их радиаци буюу цацраг идэвхт шуурга болно. Дэлхий зүүн тийшээ хазайгаад байгаа шдээ. Барилгын кранууд тэгэхээр баруун тийшээ ойчих юм. Энэ өндөр крануудаа миний үгэнд ороод хэд хоног буулгаач ээ.

-Би Н.Энхбаяр даргыг бясалгал хийдэг гэж сонсоод сонгуулийн өмнө МАХН дээр очсон юм...

-МАХН-ын бага хурал дээр очсон. Би ганц юм л хэлсэн. “Надад албан тушаал хэрэггүй ээ. Намаас надад болох гэж байгаа аюулын тухай ярих телевизийн цаг гаргаж өгөөч. Эсвэл Үндэсний аюулгүй байдлын зөвлөлийн гишүүдтэй уулзуулж өгөөч” гэсэн хүсэлт тавьсан. Яахав дээ, өөр зорилготой хүмүүс цугласан байсан. Орон нутгийн сонгууль ярилцаж байсан. Сонгууль болохгүй ээ. Сонгуультай манатай л юм болно доо.

  -Надад алдар нэр хэрэгггүй. Би дэлхийд дуурссан алдар нэртэй хүн. Олон мянган шавьтай. Надад эд мөнгө хэрэггүй. Би хангалттай мөнгө олсон. Нүцгэн ирээд, нүцгэн буцах хорвоогийн жамыг би ухаарч сэнхэрсэн хүн. Зургаан тивийн тавд нь очиж, нүд тайлсан хүн. Хэчнээн баян хүн ч хоёр давхар гутал өмсдөггүй юм. Сүүлийн 10 жил судалж, мэдэж, ойлгосон зүйлээ л монголчуудтайгаа хуваалцах гэж яваад байгаа юм.

-Тэнэгийн дотор уужуу гэж ямар үнэн үг юэ! Юу болохыг мэдэхгүй амгалан яваа хүмүүст атаархах ч шиг. Асар их юм судлаж мэдээд, сэхээрч гэгээрсэн хүний зовлон их байдаг юм байна. Хэлээд, анхааруулаад байхаар “Мэдрэл гацаа, галзуу солиотой” гэж дуудуулах юм.

-Монголын ард түмний өмнө хариуцлага хүлээдэг албан тушаал, эрх мэдэлтэй хүн нь “Оюунгэрэл ээ, би энэ улс, ард түмнийг 12 сарын 21-нд аваад орно, хариуцлагаа үүрнэ” гэвэл би болино. Гэхдээ тэр хүн өөрийнхөө эрдэмтдийн нотолгоо, няцаалтыг харуулах хэрэгтэй. Би ч өөрийнхийгөө үзүүлнэ.

-Манайхны цусанд маш их хүнд металл байгаа. Дэлхийн соронзон туйл хэлбэлзэхээр цусанд байгаа тэр металлууд нь дээш татагдаад даралт ихэсдэг байхгүй юу.

  -Манай гэрийнхэн “Өөрөө ч зовоод, дэргэдэхээ ч зовоох юм. Нэр хүндээ бод” гэдэг юм. Сүүлийн хэдэн сар ийм л хэцүү шаналгаанд байна даа. Би хувиасаа мөнгө гаргаад л энэ бүх телевизээр чинь ороод сэрэмжлүүлээд яваад байна. Ер нь би л ингээд яваад байх албатай ч биш дээ. Яахав, дараа нь хүмүүс ойлгоно доо. Оюунгэрэл ээ, баярлалаа гэж хэлнэ. Хожим харамсахгүй, сэтгэл сэвгүй байхын тулд л би ингээд яваа юм шдээ.

-Дэлхийн шинэ эзэд нь монголчууд байх болно. Манайхаас гадна Өвөр Монгол, Буриад гээд монгол туургатны амьдардаг, өвөг дээдсийн маань үлдээсэн энэ газар нутаг тэр аймшигтай юмнаас үлдэх нь байна шүү дээ. Тийм их хувь заяа...

-Дэлхийн бүх хүмүүсийг монголчууд бид захирч, Тэнгэрийн эзэнт гүрнийг байгуулах сайхан цагийг хүлээсэн. Одоо тэр сайхан юмаа нүдээрээ харах цаг ирлээ.

  -Би хувьдаа бэлтгэлээ базаачихсаан. Англи, Австралид байдаг ах дүүгээ дуудчихсан байгаа. Гэр мэрээ авчихсан.

-Миний ном “Интерном” дээр бестселлер болчихсон л байна лээ. Бас gogo, amazon сайтаар тавьж зарж байгаа. Үнэ 22 мянган төгрөг. Номоо уншаад, бас 10 сарын 7-нд болох миний хаалтын лекцэнд суугаарай. Билет захиалбал 1950 гэдэг лавлахаар хүргэж өгч байгаа.

-Шавь нар маань “Багш, үхэх гэж байгаа юм шиг хаалтын лекц гээд нэрлэчих юм” гээд л байгаа. 12 сарын 21-нээс хойш Алтан бумбын эринд шилжинэ шдээ. Тэр үед зөв сайн явах тухай ямар ч лекц шаардлагагүй болох учраас хаалтынх гэж байхгүй юу.

-Хүн төрөлхтний 26 мянган жил хүлээсэн мөч ирж байна. Коммунизм гэж нэрлэмээр эрин. Жишээ нь, би цай ууя гэж хүсэхэд л хүсэл өөрөө биелэх нь байна шүү дээ.

-Би нэг кино үзсэн. Гэхдээ тэр үнэн кино. Гадаадын бүх өндөр хөгжилтэй улсууд элитүүдээ аварч үлдэх бэлтгэлээ хийчихсэн байна. Газар доор 1,5 километрийн гүнд цаана чинь байр орон, ногооны талбай, шорон хүртэл бэлдчихсэн байна гээд бодчих. Манайд л таг чиг, нам жим.

 -Тэнгэртээ залбираад, балга үнээний сүү өөд нь цацчихад та нараас юу уначих гээд байгаа юм?

-Бас хамаагүй ярих юм, ярихгүй ч юм байна. Лекцэн дээрээ би нарийвчлан дэлгэнэ. Билет захиалбал 1950 гэдэг лавлахаар хүргэж өгч байгаа.

-Номоо би Ч.Чойсамба гэдэг мундаг сэтгүүлчээр орос хэл рүү орчуулуулсан. Орос болон хуучин Зөвлөлтийн улсуудад байдаг найз нараа сэрэмжлүүлж байна л даа. Аmazon.com дээр зарагдана. Асар их мэдээлэл, судалгаа, оюуны чадавхи шаардсан бүтээл болохоор орчуулахад туйлын хүнд л дээ.

- Шинэ дэлхийд цор ганцаар үлдэх сайхан газар нутаг дээр олон ядуу монголчуудтай хамт амьдрахгүй гэсэн гадаадын баячууд надад хорсож байгаа биз. Учрыг нь мэдээд, сэрэмжлүүлээд байхаар тэгнэ шүү дээ. Яахав дээ, намайг чадвал ална л биз. Гэхдээ би айхгүй ээ.

  Г.Оюунгэрэл гуай ярилцлагынхаа туршид өөрийнхөө номыг болон 10 сарын 7-нд болох лекцийнхээ тасалбарыг худалдан авахыг уриалсан нь үзэгчдэд багагүй эргэлзээ төрүүлсэн байна. Байгалийн гамшгийн дараа шалгагдаж, цэвэрлэгдсэн хүмүүсийн үлдэх “Алтан бумбын эринд”  нь лекц, номоос орж ирсэн мөнгө ямар хэрэгтэй байх вэ гэсэн асуулт бямба гарагийн өглөө будаатай цай ууж суусан зарим үзэгчийн толгойд эргэлдсэн нь мэдээж. FAMSI буюу Дундад Америкийн судалгааг хөгжүүлэх сангийн гүйцэтгэх захирал Санда Нөүбль (Sandra Noble) майяагийн гэх хуанли дуусч байгаа 2012 оны 12 дугаар сарын тухайд ингэж хэлжээ: Цэвэр зохиомол зүйл бөгөөд үүнд дөрөөлөн олон хүний хөлжих боломж.

  Хэн юундаа итгээд, юу ярьж явах нь эрх чөлөө боловч гараг дэлхийн төгсгөлийн тухай номлолд итгэгсдийн тухайд орчин тойрон, олон нийтэд аюултайгаар нөлөөлж болох шашны урсгал гэж олонх оронд болгоомжлонгуй ханддаг билээ. 1999 оны 9 сард дэлхий сөнөнө гэж итгэсэн Аум шинрикё сектийхэн Токиогийн метронд хорт хий тавьж байсан нь саяхан. Ломоносовын нэрэмжит их сургуулийн химийн факультет  төгссөн, Шинжлэх ухаан, дээд бо¬ловс¬ролын улсын хороонд эрдэм шинжилгээний ажил¬тан, ЗГХЭГ-ын боловсон хүчин хариуцсан зохион байгуулагч, “НИК” концерний хэлтсийн дарга, TAСIS хөтөл¬бөрийн орчуулагч, зохицуулагч байсан хүн дэлхий дахинд “Шинэ эрин” гэж нэрлэдэг шашны урсгалын Монгол дахь томоохон төлөөлөгч болчихсон яваагаа өөрөө ч мэдэхгүй байгаа бололтой. Түүний 10 жилийн турш судалсан гээд байгаа номуудын зохиогчдын нэрс New age буюу Шинэ эриний гол төлөөлөгчид байгаа юм.

  Хэрвээ 12 сарын 21-нд ёрлоод байгаа зүйл нь болохгүй бол энэ хүн 22-ны өглөө ямар тайлбар өгөх нь бас сонин байх болно. 2012 оны 11 сарын 13-нд болох нарны бүтэн хиртэлтийг ч дэлхийн төгсгөлийг зөгнөгсөд ёр хэмээн ашиглах бололтой.

  2012 оны 12 сарын 21-нийг тойрсон элдэв яриа, цуу, хөдөлгөөн, санаачилга, сэрэмжлүүлэг бөөрөнхий гараг, бөмбөрцөг дэлхийгээр маань нэг байдаг ажээ. Жишээ нь, ”Глобаль ухамсар” гэдэг төслийнхэн энэ өдөр бүх нийтээрээ нэг зэрэг бэлгийн ажил хийх “Бүх дэлхийн дур тавилт” гэдэг аян хүртэл санаачлаад явж байна. Зорилго нь дэлхийн “эрчим хүчний орон зай”-д эерэгээр нөлөөлөх. Одоогоор Г.Оюунгэрэл гуай энэ чиглэлийн хүмүүстэй эрхбиш холбогдчихоогүй байгаа бололтой.
Олныг үймрүүлсэн Г.Оюунгэрэлийн цуурхалд албан ёсны шинжлэх ухаан хэрхэн хариулж байгааг тодруулахаар 24tsag.mn-ий сурвалжлагч ШУА-ийн Одон орон, геофизикийн судалгааны төвийн захирал Ү.Сүхбаатараас дараах тодруулгыг авчээ.
Ярилцлагыг энд дарж уншина уу.