Ерөнхийлөгч Ц.Элбэгдоржийн иргэдтэй уулзах уулзалт төрийн ордонд үргэлжилж байна. Уулзалтыг нээж ерөнхийлөгч үг хэлж байна. Ерөнхийлөгчийг үг хэлсний дараагаар иргэд ээлж ээлжээр үг хэлэн санал бодлоо хэлэх юм. Ард иргэд асуух асуултаа хоёр минутанд багтаан асуухаас гадна санал бодлоо бичгээр илгээж болох юм. Тус уулзалт 3 цаг үргэлжилнэ. Уулзалтыг нээж хэлсэн үгэндээ ерөнхийлөгч "Хууль тогтоомжийн хэрэгжилт, авлигатай тэмцэх асуудал болон хар тамхи, архи, шүүхийн хэрэгжилт"-ын талаар хөндөж ярьлаа. Тэрээр мөн Н.Энхбаярын баривчилгаатай холбоотой асуудлаар сая нэг үг дуугарч иргэдэд дэлгэрэнгүй тайлбарыг өгч байна. Ерөнхийлөгч "Төрийн хулгайч бол айж амьдрах цаг ирж байна" гэдгийг санууллаа. Тэрээр "Саяын тэр дуулиантай баривчилгааны дараа цагдаа нар, хуулийнхнийг гоочлох оролдлого хийлээ. Баривчилгааны үеэр цагдаа нар тусгаарлах шугам татаад "энд хуулиас зугатсан хүн орогнож байгаа" гэдгийг иргэдэд сануулах ёстой байсан юм. Энэ шугамаас хол бай гэж иргэдэд хэлэх ёстой байсан юм. Ийм дүрэм журам дутсан байж магадгүй. Манай цагдаа, хуулийнхан арай өөрчлөгдсөн нь харагдаж байсан. Хууль хэрэгждэг гэдгийг харуулсан. Харин өөр айлын хаалга эвдэж орсондоо уучлалт гуйж байна. АТГ-аас хөрөнгө гаргаад уучлалт гуйгаад эвдсэн зүйлээ засч өгөөд явсан. Төрийн хуулийг засч чаддаг, таны төлөө явж чаддаг юм аа гэдгийг хэлж байна. Цагдаа хуулийнхан үйлчилгээний байгууллага болж байна. Энэ хандлага цааш өөрчлөгдөөд арга барил, сэтгэлгээний хандлага болно. Ийм чиглэл рүү явах  ёстой" гэж хэлсэн юм.