“Суруга Монгол” компанийн захирал Цүнэяки Хара гэх 67 настай эрэгтэй хар тамхины хэргээр цагдан хорих төвд саатуулагдаад хоёр сар өнгөрч байна. Түүнийг өнгөрсөн гуравдугаар сарын 2-нд Хан-Уул дүүрэгт байрлах “Палас” зочид буудлын 609 тоот өрөөнд мансууруулах төрлийн бодис хэрэглэж байхад нь саатуулсан юм. Тиймээс уг бодисыг хураан авч шинжлүүлэхээр Гаалийн төв лаборатори болон бусад итгэмжлэгдсэн лабораторид өгч, түүний цуснаас шинжилгээ авч мансууруулах бодис хэрэглэсэн эсэхийг шийднэ гэж байсан. Харин шинжилгээний хариу саяхан гарч, тэрээр хар тамхи хэрэглэсэн нь тогтоогдсон байна. Мөн түүнтэй хамт хар тамхи хэрэглэдэг, тээвэрлэдэг зуучилдаг хоёр хүн хамт шалгуулж байгаа. Уг этгээдүүдийг мөн цагдан хорих төвд саатуулж байгаа хэмээн эх сурвалж мэдээлэв. Тиймээс Цүнэяки Харад Эрүүгийн хуулийн 192.3-т зааснаар мансууруулах буюу сэтгэцэд нөлөөлөх эм, бэлдмэл, бодисыг борлуулах зорилгоор хууль бусаар бэлтгэсэн, олж авсан, хадгалсан, тээвэрлэсэн, илгээсэн, борлуулсан гэсэн зүйл ангиар эрүүгийн хэрэг үүсгэн, Улсын мөрдөн байцаах газарт шалгаж байна.
Хэрвээ түүний гэм буруутай нь тогтоогдвол 5-8 жилийн хорих ялаар шийтгүүлэх юм. Мөн тэрээр хар тамхи хэрэглэхдээ хоёр хүнтэй хамтарсан учир 192.3.5-д зааснаар урьдчилан үгсэж тохиролцсон буюу зохион байгуулалттай бүлэг, гэмт бүлэглэл үйлдсэн гэх зүйл анги нэмэгдэх магадлалтай хэмээн албан бус эх сурвалж мэдээлсэн юм. Хэрвээ уг зүйл анги нэмэгдвэл тэрээр арваас дээш арван таван жил хүртэл хугацаагаар хорих ял шийтгүүлэх юм.
Түүнчлэн хуулийн байгууллагаас Цүнэяки Хараг нутагтаа гэмт хэрэгт холбогдож байсан эсэхийг тодруулахаар манай хууль хяналтын байгууллагаас Японы хууль сахиулах алба руу албан тоот илгээгээд байгаа аж. Одоогоор уг албан бичгийн хариу хараахан ирээгүй байна.
Б.Чимэг
Сэтгэгдэл (1)