Энэ сарын 7-нд шөнийн 22:00 цагийн үед ЭХЭМҮТ-д гуравхан настай бяцхан хүү ирээд сэхэл авалгүй амиа алдсан талаарх мэдээллийг бид хүргэсэн. Төмөр хаалганы цаана, согтуу эцэгтэйгээ хоёулахнаа үлдсэн хүү модон сандлаар толгой нүүргүй цохиулсаар хорвоогийн мөнх бусыг үзлээ.

Сонгинохайрхан дүүргийн 14-р хороонд гарсан уг хэргийг өдгөө Сонгинохайрхан дүүргийн цагдаагийн гуравдугаар хэлтэст эрүүгийн хэрэг үүсгэн шалгаж байна. Харин хүүгээ хөнөөсөн эцгийг Хорих 461 дүгээр ангид саатуулаад байгаа юм.

Эх сурвалжуудын хэлж буйгаар төрсөн хүүгээ хөнөөсөн этгээд эхнэр, охин, талийгаач хүүгийнхээ хамт амьдардаг байсан аж.  Хэрэг гарах өдөр охин, эхнэр хоёр нь эзгүй байжээ.

Албаны эх сурвалжийн мэдээлж буйгаар хэргийн газраас эд мөрийн баримт болгож гурван хөлтэй модон сандал, гурван архины шилийг хураажээ.

Монголд гэр бүлийн хүчирхийлэл далд хэлбэрээр явсаар байна. Үүнд бяцхан хүүхдүүд, эмэгтэйчүүд өртөж амь нас, эрүүл мэндээрээ хохирч байгаа нь эмзэглэмээр асуудал болчихоод байна. Төмөр хаалганы цаана чимээгүй хүчирхийлэл цэцэглэсээр байх уу?. Гэр бүлийн хүчирхийллийн хүчтэй хууль, олон нийтийн хүчирхийллийн эсрэг масс хамгийн чухал байгааг өнгөрсөн удаад гарсан харамсалтай, жигшүүртэй хэргүүд гэрчилж байна.

Д.Ундрах /24tsag.mn/