Өөрсдийн хүч хөдөлмөрөөр эх орноо дэлхийд сурталчилж байгаа монгол залуус цөөхөн. Тэдний нэг болсон “Монгол арьсыг дэлхийн брэнд болгоё” гэсэн уриатай ажилладаг хөдөлмөрч хамт олныг энэ удаагийнхаа  “Эерэг 24” буландаа урилаа.  

“SRВ” ХХК-ийн гүйцэтгэх захирал Б.Энх-Оюун: Гэр бүлийнхээ хүнээр цалингийн зээл авахуулаад үйл ажиллагаагаа эхлүүлсэн

-Танай компани хэзээ байгуулагдсан бэ. Үйлдвэр байгуулах санаагаа хэрхэн олж байсан талаар яриагаа эхлэх үү?

-Бид “Монгол арьсыг дэлхийн брэнд болгоё” гэсэн зорилготойгоор 2012 онд үйл ажиллагаагаа эхлүүлсэн. Анх зөвхөн Япон улс руу бүтээгдэхүүнээ экспортлохоор “Sorabi” гэдэг нэртэй брэнд гаргасан маань амжилт олж цааш алхах урам зоригийг өгсөн дөө.

-Нууц биш бол анх үйл ажиллагаагаа эхлүүлэх эх үүсвэрээ хэрхэн босгож байсан бэ?

-Бид цүнхний зах зээл монголд төдийгүй дэлхийд байна гэдгийг судлаж мэдсэн. Тэгээд л гэр бүлийнхээ хүнээр цалингийн зээлийг авахуулаад хоёр хүний бүрэлдэхүүнтэй үйл ажиллагаагаа эхлүүлж байсан.

-Танайх хичнээн нэр төрлийн ямар, ямар бүтээгдэхүүн үйлдвэрлэж байна вэ?

-60 орчим нэр төрлийн цүнх мөн түрийвч, гар утасны гэр гэх мэт 30-аад төрлийн жижиг эдлэлийг үйлдвэрлэж байна.

-Та бүхэн бүтээгдэхүүнийхээ загварыг хэрхэн гаргадаг вэ?

-Экспортлох бүтээгдэхүүний загварын санааг худалдан авагч нь өөрөө гаргадаг. Уг санаанд нь үндэслээд манайхан загвараа зохиодог. Япончууд зузаан арьсаар хийсэн, тод өнгийн цүнхэнд дуртай байдаг. Харин Солонгосчууд нимгэн, загварын хувьд ч тэс өөрийг сонирхдог. Энэ бүгдэд тохируулахаас гадна загварын чиг хандлагыг харгалзан үзэж цаг үеэ мэдэрсэн, зориулсан хүмүүстээ таалагдсан загвар гаргахыг хичээдэг. Манай үйлдвэр хоёр дизайнертай.

-Бүтээгдэхүүн үйлдвэрлэх түүхий эд, арьсаа хаанаас нийлүүлдэг вэ?

-Биднийг үйл ажиллагаагаа эхлүүлэхээр судалж байхад “Монгол шевро” компаниас өөр манай шаардлагад нийцсэн арьс боловсруулдаг газар байгаагүй. Тиймээс бид зөвхөн “Монгол шевро”-гийн боловсруулсан арьсаар бүтээгдэхүүн үйлдвэрлэдэг байсан. Харин сүүлийн үед нэмээд “Дархан нэхий”, “Их эргэлт” ХХК-аас арьс авч байгаа. Эдгээрийн боловсруулсан арьсны чанар үнэхээр сайжирсан шүү.

-Монгол арьсаар цүнх хийхэд хэр тохиромжтой байдаг юм бол. Гологдол арьс хэр их гардаг вэ?

-Гадны улс орнуудад боловсуулагдаж байгаа арьс 100 хувь талбай ашиглалттай байдаг. Харин монгол малын арьснаас гологдол их гардаг. Гэхдээ Монгол арьсны чанар, эдэлгээ хамаагүй илүү. Учир нь Монгол мал байгальтайгаа маш ойр байдаг нь үүнд нөлөөлдөг гэж би боддог.    

Монгол малын арьс байгаль, цаг ууртаа зохицсон бат бөх, эдэлгээ удаантай байдаг.

-Бүтээгдэхүүний үнийн хувьд ямар байдаг вэ?

-Тухайн бүтээгдэхүүнд хэр их цаг зарцуулж хийсэн, хэдий хэмжээний орц орсон зэргээс шалтгаалан үнэ нь янз бүр байдаг. Мөн дээр хэлсэнчлэн монгол малын арьснаас гологдол их гардаг нь үнэд бас нөлөөлдөг.  Ер нь 90 мянгаас нэг сая төгрөгийн үнэтэй борлуулагддаг.

-Бүтээгдэхүүнийг хаана, хаана борлуулж байна вэ?

-“Улсын их дэлгүүр”, “Макс молл” их дэлгүүрүүдэд лангуу түрээслээд  худалдаалдаг. Мөн саяхан Япон улсад өөрийн нэрийн дэлгүүрээ нээсэн. Түүнчлэн онлайнаар захиалга авч борлуулдаг.

-Компанийн техник технологи, ажиллах хүчний талаар сонирхуулаач?

-Манай компани 12 үндсэн ажилтантай. Мөн ижил төрлийн бизнес эрхэлдэг хувь хүн болон компаниудтай гэрээгээр хамтран ажилладаг. Тоног төхөөрөмжийн хувьд Япон, Солонгос улсад үйлдвэрлэсэн оёдол, эсгүүрийн машиныг ашигладаг.

-Монгол арьс, импортын арьснаас юугаараа ялгаатай байдаг юм бэ?

-Монгол мал байгальдаа өсөж үрждэг учраас арьс нь байгаль, цаг ууртаа зохицсон бат бөх, эдэлгээ удаантай байдаг. Тиймээс манайх бүтээгдэхүүнээ “Насан туршийн хэрэглээ” гэж онцолж сурталчилдаг. Харин импортын арьсыг татаж сунган, нимгэлж боловсруулдаг болохоор арьсных нь шинж чанар алдагдсан байдаг.

-Бэлэн болсон бүтээгдэхүүнээ аль, аль улсад экспортлож байна вэ?

-Одоогоор Япон, Солонгос, Тайвани улс руу экспортлож байгаа. 

-Гадаад худалдаа хийхэд ямар нэгэн саад бэрхшээл гардаг уу. Татвар хураамж хэр өндөр байдаг вэ?

-Манай улсаас арьс ширэн бүтээгдэхүүн экспортлоход ямар нэгэн татвар хураамж байдаггүй. Харин гадны улс орон луу оруулахад тухайн улсынхаа хуулинд заасан татвар хураамжийг нь төлөөд оруулдаг.

Бидэнтэй ярилцсан танд баярлалаа. Ажлын амжилт хүсье.

Эерэгээр холбоотой байя 24 цаг.

Б.Батчимэг