Энэ сарын 7-нд шөнийн 22:00 цагийн үед ЭХЭМҮТ-д гуравхан настай бяцхан хүү ирээд сэхэл авалгүй амиа алдсан талаарх мэдээллийг бид хүргэсэн. Төмөр хаалганы цаана, согтуу эцэгтэйгээ хоёулахнаа үлдсэн хүү модон сандлаар зодуулсан хорвоогийн мөнх бусыг үзсэн талаар эх сурвалжууд хэлсэн.

Сонгинохайрхан дүүргийн 14-р хороонд гарсан уг хэргийг өдгөө Сонгинохайрхан дүүргийн цагдаагийн гуравдугаар хэлтэст эрүүгийн хэрэг үүсгэн шалгаж байна. Харин хүүгээ хөнөөсөн эцгийг Хорих 461 дүгээр ангид саатуулаад байгаа бөгөөд онц хэрцгий аргаар хүний аминд хүрсэн гэх зүйл ангиар эрүүгийн хэрэг үүсгэсэн талаар эх сурвалж мэдээллээ.

Эх сурвалжуудын хэлж буйгаар төрсөн хүүгээ хөнөөсөн гэх этгээд эхнэр, охин, талийгаач хүүгийнхээ хамт амьдардаг байсан аж.  Хэрэг гарах өдөр охин, эхнэр хоёр нь эзгүй байжээ.

Албаны эх сурвалжийн мэдээлж буйгаар хэргийн газраас эд мөрийн баримт болгож гурав хуваагдсан модон сандал, гурван архины шилийг хураажээ.

Хүүхдээ хөнөөсөн гэх Б-ийн хувьд сэтгэл судлаач, багш хүн гэдгийг эх сурвалж хэлэв. Архи дарс хэрэглэж эхнэр хүүхдээ хүчирхийлдэггүй хүн байсан бөгөөд энэ хэрэг санаандгүй байдлаас болсон байхыг үгүйсгэхгүй аж.

Монголд гэр бүлийн хүчирхийлэл далд хэлбэрээр явсаар байна. Үүнд бяцхан хүүхдүүд, эмэгтэйчүүд өртөж амь нас, эрүүл мэндээрээ хохирч байгаа нь эмзэглэмээр асуудал болчихоод байна. Төмөр хаалганы цаана чимээгүй хүчирхийлэл цэцэглэсээр байх уу?. Гэр бүлийн хүчирхийллийн хүчтэй хууль, олон нийтийн хүчирхийллийн эсрэг масс хамгийн чухал байгааг өнгөрсөн удаад гарсан харамсалтай, жигшүүртэй хэргүүд гэрчилж байна.

 /24tsag.mn/