Монголчууд АНУ-д зарагдах гэж байсан Т.Батаараа эх орондоо авчраад удаагүй байна. Гэтэл Т.Батаарын “хамаатан” Францын гаальд саатуулагдсан тухай тус улсын “Leprogres.fr” сайт мэдээлжээ.

Энэхүү үлэг гүрвэлийн яс Монгол дахь Т.Батаартай адил хулгайгаар Францад очсон байж болзошгүй хэмээн үзэж байна.

Сайтад бичсэнээр Монголын говиос олдсон Тарбозавр батаарын яс БНСУ-аар дамжин, Францын Леон хотын гаалиар орж ирэхдээ хураагдсан байна. Т.Батаарын яс тус улсын Жаннат гэх жижигхэн хотод хүрэх ёстой байжээ. Гэвч Леон хотын гаалиар орж ирэхэд нь хураан авчээ.

Ясыг тээвэрлэж явсан хүн нь палеонтологич мэргэжилтэй эрэгтэй хүн бөгөөд  түүнийг Леон хотын цагдаагийн байгууллагад хүлээлгэн өгчээ. Тээвэрлэгч эр БНСУ-ын талтай худалдааны гэрээ байгуулсан бичгээ гаалийнханд үзүүлсэн аж. Уг гэрээнд үлэг гүрвэлийн ясыг ойролцоогоор 700 мянган еврогоор үнэлсэн байна. Урьдчилгаанд нь 40 мянган евро төлсөн баримт хавсаргасан байжээ.  

Жаннат хотод үлэг гүрвэлийн томоохон музей байдаг гэнэ. Тиймээс Т.Батаарын ясыг музейд худалдаалах зорилготой байж болзошгүй хэмээн таамаглаж байна.  

Францын палеонтологичид үлэг гүрвэлийн ясыг нарийвчлан судалж, гарал үүсэл болон он тооллыг тогтоохоор ажиллаж байгаа гэлээ.

Т.Батаарын ясыг нямбай сайтар боож, гэмтээхээргүй саванд хийсэн байсан бөгөөд дээр нь БНСУ гэсэн шошгоор тэмдэглсэн байна. Мөн “ясны нийт жин нэг тонн” хэмээн тэмдэглэсэн байжээ. Түүнчлэн үлэг гүрвэлийн яс ямар ч гэмтэлгүй, бүрэн бүтнээрээ сайн хадгалагдаж очсон хэмээн хэвлэлд онцолсон байна.  

Францын холбогдох албаныхан энэ талаар тус улсад суугаа Монголын Элчин сайдын яаманд мэдээлэл хүргүүлжээ. Монголын үлэг гүрвэлийн яс хэрхэн БНСУ-д хүрсэн нь тодорхойгүй байна.

Г.Үжин

www.24tsag.mn