“Эрдэнэс Тавантолгой”-н гүйцэтгэх захирлаар ажиллаж байсан Я.Батсуурийг АТГ-аас авлигалын хэрэгт татан шалгаж улмаар цагдан хориод байгаа билээ. Хамгийн сүүлийн мэдээллээр түүний  биеийн байдал нь хүндэрч хорих 461-р ангийн эмнэлэгт хэвтсэн гэж буй. Түүний өмгөөлөгч Х.Базаррагчаагийн хэлж буйгаар Я.Батсуурийн нойр булчирхайн архаг үрэвсэл, зүрх судас, артерийн даралт ихсэх зэрэг өвчин нь хүндэрсэн гэнэ. Цаашид төрөлжсөн нарийн мэргэжлийн эмнэлэгт хандах зайлшгүй шаардлагатай байгаа аж. Мөн ээжийнх нь биеийн байдал хүндэрч хэвтэрт  орсон байна. Тиймээс түүний хувийн байдлыг харгалзан үзэж гадуур байлгаж хэргийг нь шалгах бүрэн боломжтой гэж Я.Батсуурийн өмгөөлөгч Х.Базаррагчаа үзэж байгаа аж.

Учир нь Я.Батсуурь хэргийг мөрдөн шалгах ажиллагаанд саад учруулах боломжгүй гэнэ. Нэгдүгээрт, түүний биеийн байдал тааруу байгаа. Хоёрдугаарт, Эрдэнэс-Тавантолгойн гүйцэтгэх захирлын ажлаас чөлөөлөгдсөн учраас албан тушаалын байдлаа ашиглан мөрдөн байцаалтын ажиллагаанд саад учруулах боломжгүй гэнэ.

Өмгөөлөгч Х.Базаррагчаагийн хувьд Я.Батсуурийг гадуур гаргах хүсэлтийг АТГ, прокурор, шүүхэд удаа дараа гаргасан боловч одоогоор нааштай хариу өгөөгүй байна.

Я.Батсуурийн хувьд өөрт нь холбогдуулан шалгаж байгаа хэргийн үнэн, мөнийг олж тогтоолгох хүсэлтэй байгаа учраас болж буй асуудлуудад хүлээцтэй хандаж буйг өмгөөлөгч нь ярьж байна.Харин удаан хугацаагаар хорьж шалган, эрүүл мэндээр нь хохироож байгаад л гомдолтой байгаа аж.

Т.Энхэлээ