Монгол эмэгтэйчүүдийн суу билгийг гайхан бишрээд ханамгүй. 15-хан настайгаасаа гадаадад ажиллаж, амьдарч байгаад эх орондоо ирсэн нэгэн эмэгтэй Монголдоо гоо сайхны эрүүлжүүлэх бүтээгдэхүүн үйлдвэрлэж байна.гэх мэдээллийн дагуу “Натурал Эссеншлс” ХХК-ийг зорьлоо.

Тус компани нь органик гоо сайхны бүтээгдэхүүн үйлдвэрлэдэг болохоор үйлдвэрийн хаалгаар орвол хүнсний үйлдвэр шиг чацаргана жимс, Наргил модны тосны таатай үнэр үнэртэж байлаа. Харин ширээн дээр дэлгэсэн саван, ванны бөмбөлөгнүүд нь амтат бялуу шиг ёстой л нэг арааны шүлс асгаруулам харагдаж байв.

Ингээд бид олон жил хүний нутагт хүнд бэрхийг туулж улмаар эх орондоо ихийг хийж бүтээх эрч хүч, хүсэл эрмэлзэлээр дүүрэн яваа “Натурал Эссеншлс” ХХК-ийг Д.Хулан гэх даруухан бүсгүйтэй хэдхэн хөрөм хөөрөлдлөө.

“Натурал Эссеншлс” ХХК-ийн захирал Д.Хулан: Уруул өнгөлөгч, биеийн болон хүүхдийн саван, ванны бөмбөг үйлдвэрлэж байна

-Танай үйлдвэр хэзээ байгуулагдсан талаар яриагаа эхлэх үү?

-Манай “Натурал Эссеншлс” ХХК 2014 онд байгуулагдаж, өнгөрсөн сарын эхэнд анхны бүтээгдэхүүнээ худалдаанд гаргасан. Гэхдээ бид компаниа байгуулж үйлдвэрлэлээ эхлэхээс өмнө бараа бүтээгдэхүүнийхээ бүх судалгааг бэлэн болгосон байсан.

-Үйлдвэр байгуулах санаагаа хэрхэн олж байв. Өөрөө энэ мэргэжлийн хүн үү?

-Манай орон шиг эрс тэс уур амьсгалтай улсад арьс арчилгааны органик бүтээгдэхүүн шаардлагатай гэдгийг судалж үзээд үйлдвэрээ байгуулсан. Гэхдээ хамгийн гол нь  би ямар ажил хийвэл насан туршдаа өдөр болгон хийсэн ажилдаа сэтгэл хангалуун байж, аз жаргалыг мэдрэх вэ гэж бодоод үйлдвэр байгуулахаар шийдээд өөрийн мэргэжилд ойр болохоор орнаник гоо сайхны эрүүлжүүлэх бүтээгдэхүүн үйлдвэрлэхээр шийдсэн. Үүнийг гэр бүлийнхэн маань ч ихээр дэмжсэн.

-Та бүхэн хэдэн нэр төрлийн бүтээгдэхүүн үйлдвэрлэж байна вэ?

-Хэрэглэгчид манайхыг гадаадад бүтээгдэхүүнээ үйлдвэрлэчихээд монголдоо савладаг юм уу гэж асуудаг. Харин бид бүгдийг дотооддоо үйлдэрлэж, савлаж байна. Одоогоор биеийн саван, ванны бөмбөг, уруул өнгөлөгч, хүүхдийн саван гэсэн дөрвөн нэр төрлийн “LHAMOUR” бренд бүтээгдэхүүн үйлдвэрлэж байна.

-Эдгээрийг ямар, ямар түүхий эдээр хийдэг юм бэ?

-Бүтээгдэхүүн бүрийнхээ онцлогт тохируулаад өөр өөр түүхий эдээр үйлдвэрлэдэг. Тухайлбал ванны бөмбөгийг жамц давс, чацарганы тос, Оливын тостойгоор өдөр болгон үйлдвэрлэж хэрэглэгчийн гарт хүргэдэг. Харин биеийн болон хүүхдийн саванг чацарганы тос, Оливын тостойгоор үйлдвэрлэж, гурван сарын хугацаатай хатааж зах зээл нийлүүлдэг. Уруул өнгөлөгчийг Чацаргана, Зөгийн лаав, Наргил модны тосоор хийдэг. Уруул өнгөлөгчийн хувьд Монгол Улсад анх үйлдвэрлэж байгаа бүтээгдэхүүн гэдгээрээ онцлогтой.

-Түүхий эдээ хаанаас нийлүүлдэг талаар сонирхуулаач?

-Бид ихэнх түүхий эдээ Монголоосоо авдаг. Жамц давс, Чацарганаа Увс аймгаас, Зөгийн лаваа Сэлэнгээс нийлүүлж байгаа. Харин Наргил модны тос, Оливын тос зэргийг Энэтхэгээс авч ирдэг. Дээрх газруудаас түүхий эдээ авч ирээд өөрсдөө гар аргаар боловсруулж, цэвэр тосоо гаргаад бүтээгдэхүүнээ хийдэг. Энэ нь ч чанарт сайнаар нөлөөлдөг гэж боддог.

-Тоног төхөөрөмж, боловсон хүчний хувьд хэр хангалттай байдаг вэ. Манай улсад энэ төрлийн мэргэжлийн хүн байдаг юм болов уу?

-Одоогоор манай бүх бүтээгдэхүүн гар аргаар хийгдэж байгаа. Харин мэргэжлийн хүн байхгүй болохоор ажилтнуудаа өөрөө зааж сургаад үйлдвэртээ ажилуулж байгаа. Ер нь боловсон хүчин сонгож, зааж сургах гэж нэлээд бэрхшээлтэй байсан. Анх ажиллаж байсан хүмүүс итгэлийг маань алдаж, хулгай хийж, худлаа хэлж байснаас болоод үйлдвэрээ зогсоох хүртлээ сэтгэлээр унаж байсан шүү. Гэхдээ одоо сэтгэл нийлсэн сайхан хамт олонтой болоод ажил төрөл ч бүтэмжтэй байгаа. 

-Бүтээгдэхүүнээ жаахан дэлгэрүүлээд танилцуулаач?

-Ванны бөмбөг маань давс, тосны холимог учраас ядаргаа тайлж, арьсыг эрүүлжүүлэх үйлчилгээ үзүүлдэг бол биеийн саван арьсыг өнгөлөг толигор болгож, ус, тосны хэмжээг тэнцвэржүүлдэг. Мөн уруул өнгөлөгч уруулыг 100 хувь чийгшүүлж, эмчлэх үйлчилгээтэй.  Манай бүтээгдэхүүн 100 хувь цэвэр байгалийн гаралтай болохоор аль ч насны ямар ч хүйсийн хүн хэрэглэхэд тохиромжтой. Түүнчлэн бид харшилын эмнэлэгтэй хамтарч ажилладаг. Тэдний үйлчилүүлэгч нарт ч манай бүтээгдэхүүн сайнаар нөлөөлж байгаа нь батлагдсан. 

-Бүтээгдэхүүний уусалт чанарын хувьд хэр байдаг юм бол. Зарим саван маш хурдан дуусчихаад байдаг шүү дээ?

-Манай савангууд тослог ихтэй байдаг болохоор уусалт удаантай. Нэг саванг өдөр болгон хэрэглэхэд хоёр сар болно шүү. Ер нь манай саван цэвэр органик бүтээгдэхүүн болохоор нүүр гар, үс гээд л бүгдийг угаах боломжтой. Ямар нэгэн эсрэг заалт байхгүй. Хэрэглэж үзсэн хүмүүс ч сэтгэл хангалуун байгаа.

-Үнийн хувьд ямар байгаа, хаана, хаана худалдаалж байгаа талаа яриач?

-Иргэдийн дунд Монголд үйлдвэрлэсэн л бол хямд байх ёстой гэсэн ташаа ойлголт байдаг. Гэтэл бид чанартай, сайн бүтээгдэхүүн үйлдвэрлэж, хэрэглэгч нартаа нийлүүлэхийг зоридог. Манай саван, хөөс, уруул өнгөлөгнүүд химийн бодис агуулагдаж их хэмжээгээр үйлдвэрлэгддэг бүтээгдэхүүнийг бодвол арай үнэтэй байгаа. Гэхдээ цэвэр органик бүтээгдэхүүн гэдэг утгаараа бол харицангуй боломжийн гэж ойлгож болно. Жишээ нь биеийн саван 10 мянга, уруул өнгөлөгч 8000, ванны бөмбөг 7900 төгрөгөөр бүтээгдхүүнээ Скай,23 дугаар сургуулийн баруун талд байрлах 38-р байрны "Бид органик" дэлгүүр зэрэг долоон цэгээр зарагдаж байгаа.

-Шинэ гарч ирж байгаа бүтээгдэхүүн учраас  борлуулалт хэр байна вэ?

-Сар гаруйн өмнө худалдаанд гарсан гэхэд борлуулалт сайн байгаа. Бүтээгдэхүүний чанарыг мэдэрч, хэрэглэсэн хүмүүс нөгөөдөө дамжуулах маягаар зарагдаж байна. Ер нь бид хэвлэл мэдээллийн хэрэгслээр реклам сурталчилгаа цацаагүй ингээд бодохоор манай бүтээгдэхүүн өөрөө өөрийгөө л борлуулаад байгаа гэхэд болно доо.

-Шинээр бэлгийн багц худалдаанд гаргаж байгаа гэж байна. Үүнийгээ жаахан тодруулаад яриач?

-Өнөөдөр бэлгийн багц худалдаанд гарахад бэлэн болоод байна. Хүмүүс үргэлж л нэгэндээ бэлэг барьж, өдөр болгон нэгнийгээ баярлуулахыг хүсдэг. Тиймээс бид соёлтой, эрүүлжүүлэх органик бүтээгдхүүнийг сонгоосой гэдэг үүднээс багцаа худалдаанд гаргаж байгаа юм. Мөн энэ үйлчилгээндээ зориулаад “IРМ” компанитай хамтраад энэ сард нэг бүтээгдэхүүн худалдан авсан ч үнэгүй хүргэж өгөх үйлчилгээг давхар үзүүлж байна. Одоогоор найман төрлийн бэлгийн багц бэлэн болоод байгаа.

-Өдөрт хичнээн хэмжээний бүтээгдэхүүн үйлдвэрлэж байна вэ?

-Одоогоор хэрэглэгчдийнхээ хэрэгцээнд тохируулаад л үйлдвэрлэж байгаа. Ямар нэгэн байдлаар их хэмжээний захиалга ороод ирвэл хүссэн хэмжээгээр нь үйлдвэрлэж, нийлүүлэх боломжтой. 

-Танай бүтээгдэхүүн эко шошготой юм билээ. Энэ талаар?

-Бид бүтээгдэхүүнээ анх худалдаанд гаргахдаа Худалдаа аж үйлдвэрийн танхимаас “Органик бүтээгдэхүүн” гэсэн эко шошгоо авсан. Бүтээгдхүүний сав баглаа боодлыг монголд хоёрдогч түүхий эдээр үйлдвэрлэсэн зүйлээр хийж байгаа. Мөн бүтээгдэхүүний шошго, хаяг рекламуудыг ч гэсэн монгол зураач, дизайнар нараараа гар аргаар хийлгэж байгаагаараа онцлог. Ер нь бид үндэснийхээ үйлдэрлэгч нартайгаа хамтраад нэг нэгний дэмжих зорилгоор л үйлдвэрлэлээ явдуулж байна.  

-Цаашид ямар, ямар бүтээгдэхүүн үйлдвэрлэхээр төлөвлөж байна вэ?

-Ямар ч гэсэн энэ жилдээ багтаж, биеийн скраб, тос үйлдвэрлэхээр төлөвлөж байгаа.  

-Мэдээж өөрсдийн түүхий эдээр, монгол брэндийг бий болгохоор зорьж байгаа та бүхний хувьд бүтээгдэхүүнээ экпортод гаргахаар бодож, төлөвлөж байгаа байх. Энэ талаар?

-Тэгэлгүй яах вэ. Мэдээж дотоодын зах зээлээ хангаад зогсохгүй дэлхийн зах зээлд гаргах нь бидний гол зорилгын нэг яах ч аргагүй мөн. Манай бүтээгдэхүүнийг гадны улс орон луу авч явсан хүмүүс бас магтаалын үг сонсч байна гэсэн шүү. Энэ ч бидэнд урам зоргийг өгч байгаа. 

Эерэгээр холбоотой байя 24tsag.mn

Б.Батчимэг