УИХ-ын эмэгтэй гишүүдийн бүлэг Гэр бүлийн хүчирхийлэлтэй тэмцэх хуулийн шинэчлэлийн талаар мэдээлэл хийлээ. Тус хуульд шинэчлэл хийхэд эмэгтэй гишүүдийн бүлэг идэвхтэй ажилласан байна. Хуулийг УИХ-д өргөн барьсан бөгөөд дараалал харгалзахгүй хэлэлцэхээр болжээ. Ингээд Гэр бүлийн хүчирхийлэлтэй тэмцэх тухай хуульд ямар шинэчлэлүүд орж байгаа талаар эмэгтэй гишүүд ингэж ярилаа.
УИХ-ын гишүүн Л.Эрдэнэчимэг
- Манай улс Гэр бүлийн хүчирхийлэлтэй тэмцэх хуультай болоод 10 гаруй жил болж байна. Энэ хугацаанд гэр бүлийн хүчирхийлэлээс болж хүний амь нас, эрүүл мэнд хохирсон хэрэг буурахгүй байгаа. Сүүлийн үед энэ тоо улам нэмэгдэж байна. Сүүлийн гурван жилийн хугацаанд гэр бүлийн хүчирхийллээс болж 62 хүн амь насаа алдсан. Тиймээс Ерөнхийлөгчийн зүгээс Гэр бүлийн хүчирхийллийн хууль өргөн баригдаад байгаа. УИХ дахь эмэгтэй гишүүдийн бүлэг тус хуулийг байнгын хороогоор хэлэлцүүлэх, УИХ-аар батлуулах үүргийг хүлээж байгаа. Гэртээ агсан тавиад хүчирхийлэл үйлдэж байгаа тохиолдолд цагдаа эрүүлжүүлхэд хийхдэг. Маргааш нь хохирогч өөрийнхөө мөнгөөр хүчирхийлэл үйлдсэн хүнээ авдаг. Өөрөөр хэлбэл, хохирогч дахин, дахин хохирсоор байна. Хохирогч гомдолд гаргаад шүүхэд хандахад гэмтэлийн зэргийг тогтоодог. Гэмтэлгүй гэж гаргавал хэрэг үүсгэхээс татгалзаж, хөнгөн гэмтэлтэй байвал ихэвчлэн эвлэрлээр шийддэг. Тиймээ манай улсад гэр бүлийн хүчирхийллийн эсрэг чамбай хууль шаардлагатай байна.
Д.Сарангэрэл: Хохирогчийн ойр дотны хүмүүс гомдол гаргаж болно
- Гэр бүлийн хүчирхийлэлтэй тэмцэх хуулийн төслийг хаврын чуулганаар хэлэлцэх хүсэлтийг УИХ-ын даргад хүсэлт тавьхад зөвшөөрсөн. Би хувь хүнийхээ үүднээс Гэр бүлийн хүчирхийлэлтэй тэмцэх хуулийн төслийн ажлын хэсэгт хоёр санал өгсөн. Нэгдүгээрт гэр бүлийн хүчирхийлэлд өртөж байгаа хохирогч заавал өөрөө гомдол гаргах биш, түүний дотны хамаатан садан, найз нөхөд гаргаж болох заалтыг тусгах нь зүйтэй гэж үзэж байгаа. Эмэгтэй хүн нөхөр, найз залуугийнхаа хүчирхийлэлд өртөж байгаа хэрнээ, гомдол гаргахад хойрго ханддаг. Хоёрдугаарт гэр бүлийн хүчирхийлэл болж байгааг айл хөршийнх нь заавал мэдээлэлдэг байх заалт орох ёстой гэсэн санал өгсөн. Тэр санал маань хуульд тусгагдсанд их баяртай байгаа. Хамгийн сүүлд дөрвөн настай охин аав, хойд ээждээ зодуулан аврал эрж байхад хөршийнх нь мэдэж байсан хэрнэ мэдээллээгүй. Бид Гэр бүлийн хүчирхийлэлтэй тэмцэх хуулийг нэг тал руу нь авч давхихгүй. Хүүхдээ буруу зүрүү зүйл хийсний төлөө алгадасны төлөө хүчирхийлэл үйлдлээ гэж үзэх заалт орохгүй. Хайр нь дотроо хал нь гаднаа байдаг аавуудын талаар ярихгүй.
З.Баянсэлэнгэ: Гэр бүлийн хүчирхийлэл бол эрүүгийн гэмт хэрэг
- Өмнө нь хүний бие махбодид ноцтой гэмтэл учруулж, амь нас нь хохироогүй бол гэр бүлийн хүрээний асуудлыг дандаа иргэний журмаар шийддэг байсан. УИХ-д өргөн мэдүүлсэн Гэр бүлийн хүчирхийлэлтэй тэмцэх тухай хуулийн төсөлд хариуцлагын асуудал гурван хуулиар зохицуулагдана. Удаа дараа байнга хүчирхийлэл үйлдсэн бол эрүүгийн хуулиар, хүчирхийлэл үйлдэгдэж байгааг мэдсээр байж мэдээлээгүй бол зөрчлийн тухай хуулиар, хөнгөн буюу нөлөөллийн, урьдчилан сэргийлэх арга хэмжээ авахаар зохицуулсан. Одоо хүчин төгөлдөр мөрдөгдөж байгаа Гэр бүлийн хүчирхийлэлтэй тэмцэх тухай хуульд процессын ажиллагааг тодорхой тусгаагүй, хууль хоорондын уялдаа холбоог хангаагүйгээс хүний амь насанд хүртлээ хүндэрч байна.
Ц.Оюунгэрэл: Бүх зүйл хүчирхийллийг үл тэвчих соёлоос эхэлнэ
Гэр бүлийн хүчирхийлэл гэх чөтгөрийн тойргоос эхлээд гарах ёстой. Энэ чөтгөрийн тойргийг таслан зогсоох эхлэл нь хүчирхийллийг үл тэвчих соёлоос эхэлнэ. Хүчирхийллийг үл тэвчиж болно гэдэг нь гэр бүлийн хүрээнээс хальж, нийгэм тэр чигээрээ үл тэвчих соёлд суралцахыг хэлж байгаа юм. Бид ардчилсан Үндсэн хууль баталснаас хойш 25 жил хүчирхийлэл бол гэмт хэрэг биш гэж үзэн тэвчиж ирсэн байна л даа. Тэгэхээр гэр бүлийн хүчирхийллийг тэвчсэн, хүлээн зөвшөөрсөн энэ эрхзүй орчноо яаралтай сольж, хүчирхийлэл бол гэмт хэрэг юм гэдэг нэг мөр ойлголттой болох ёстой. Хүчирхийллийн асуудалд эрүүгийн хэргийг авч хэлэлцдэг шиг хариуцлагатай хандах ёстой. Цагдаа, шүүгч, нийгмийн ажилтан гээд төрийн албан хаагчид хүртэл хүчирхийллийг байж болох, тэвчиж болох мэтээр хандаж ирсэн. Тиймээс хуулиар илүү хүчтэй болгох шаардлагын үндсэн дээр хуулийн төслийг УИХ-д хэлэлцүүлэн батлуулахаар зорьж байна. Анхнаасаа хүчирхийллийг үл тэвчих үзэл дээр суурилж боловсруулагдсан хууль. Нэг өдөр, нэг цаг ч болов хүчирхийллийг үл тэвчихийг уриалж байна.
Т.Энхэлээ
