-Тус сумын иргэдэд хандив тусламж үзүүлэх уриалга гаргалаа-

Сүхбаатар аймгийн Түмэнцогт сумын нутаг дэвсгэрийн 80 хувь түймэрт автаад байна. Харин дэгдээд байгаа түймрээс үлдсэн газрын 10 хувийг хамгаалах боломжгүй байгаа аж.

Өнгөрсөн өдрүүдэд гарсан түймэр сумын төв рүү нэг км хүртэл ойртсоныг цурманд оруулж чадсан ч цаг агаарын байдлаас шалтгаалан өнөөдөр дахин дэгджээ. Тус суманд өдөртөө салхи 18-20 м/сек, шөнөдөө 16-18 м/сек байгаа аж. Одоогийн байдлаар онцгой байдлын  150 гаруй ажилтан, нутгийн иргэд шуурхай ажиллаж байгаа ч хүн хүч дутмаг байгаа болохыг албаны эх сурвалж мэдээллээ. Түүнчлэн түймэр цааш дэгдэн аюултай байдалд шилжвэл эмэгтэйчүүд, ЕБС- ийн ахлах ангийнхныг дайчлаж магадгүй байгаа юм байна. Түймэрт одоогоор 20 айлын 22 гэр шатсан бол үхсэн малын тоог гаргах боломжгүй байгаа аж.

Ийнхүү байгалийн давтагдашгүй хүчин зүйлээс шалтгаалан, орон гэр, эд хөрөнгө, эрүүл мэндээрээ хохирол амсаад байгаа тус сумын иргэдэд хандив тусламж үзүүлэх зорилгоор Түмэнцогт сумын нутгийн зөвлөлөөс хандивын данс нээж, уриалга гаргасан байна.

Уриалгад “Түймрийн улмаас хүнд байдалд ороод байгаа хүмүүстээ нэг санаа сэтгэлээр тусалж, нэгдэх цаг нь иржээ. Халуун сэтгэлийн энэ аяныг өрнүүлж, шатах аюултай бүс нутагт байгаа Түмэнцогтчуудад тусламжийн гараа хамтдаа сунгацгаая. Тэдэнд туслах аяны цуваа хэдийнэ эхлээд байгаа юм. Нутгийн залуучууд нутаг руугаа хүлгийн жолоо залж, өөрсдөө гал унтраах ажилд оролцож байгаа бол зарим нь эд мөнгө, өөрийн оролцоо, сэтгэлийн дэмийг түймэрт хохирсон иргэдэд илгээсээр байна. Хандивын энэ цуваанд та нэгдэж, цувааг үргэлжлүүлж, улсынхаа нэг сумын иргэдэд туслая” гэжээ.

Сүхбаатар аймгийн Түмэнцогт сумын нутгийн зөвлөлийн данс -Хаан банк: 5021508978, холбоо барих утас нь 99057577, 96047577 юм байна.