Дуулиан-2020 заалны хөлбөмбөгийн тэмцээний аваргууд өнгөрсөн амралтын өдрүүдэд тодорлоо. 30 гаруй мянган тамирчин зургаан сарын хугацаанд өрсөлдсөний эцэст шилдгүүдээ шалгаруулсан нь энэ юм байна.
“Найрсаг Улаанбаатар” хөтөлбөрийн хүрээнд Нийслэлийн засаг дарга бөгөөд Улаанбаатар хотын захирагчийн дэмжлэгтэйгээр зохиогдсон Улаанбаатар хотын аварга шалгаруулах “Дуулиан-2020” заалны хөлбөмбөгийн тэмцээний 2014-2015 оны улирлын тоглолт явагдаж нийт 5 насны ангилалд эрэгтэй эмэгтэй 10 төрөлд аваргуудаа тодруулжээ. Энэ удаагийн тэмцээн гурван үе шаттай явагдсан бөгөөд эхний шат өнгөрсөн намар болж сургууль, албан байгууллагууд тус бүрдээ аваргуудаа тодруулсан байна. Харин хоёр дахь шатанд дүүргийн аваргуудаа шалгаруулж сүүлийн шатанд Улаанбаатар хотын заалны хөлбөмбөгийн аваргууд тодорсон нь энэ юм байна.
Энэ үеэр “Их талын дуулиан” ТББ-ын удирдах зөвлөлийн гишүүн Д.Хүрэлбаатартай цөөн хором ярилцлаа.
-2014-2015 оны “Дуулиан-2020” тэмцээнийг та хэрхэн дүгнэх вэ?
-Ес дэх удаагийн Дуулиан-2020 тэмцээний онцлог нь 30 гаруй мянган авьяаслаг тамирчид зургаан сарын хугацаанд 100 гаруй ивээн тэтгэгчийн хамт хурд, хүч, ур чадвараа сорьсонд оршиж байна.
-Тэмцээнийг Нийслэлийн засаг даргын дэмжлэгтэйгээр зохиож байгаа гэсэн?
- Дуулиан тэмцээнд оролцогч тамирчид чөлөөт цагаа зөв өнгөрөөх, амжилтын төлөө ганцаараа биш баг хамт олноороо тэмүүлэх гэсэн үндсэн зорилготой оролцдог. Иймээс ч “Найрсаг Улаанбаатар” хөтөлбөрийн хүрээнд Нийслэлийн Засаг даргын дэмжлэг дор гурав дахь жилдээ амжилттай явагдаж өндөрлөлөө. Монголчууд үндэсний бөх хурдан моринд хорхойсдог хэдий ч залуу үе тэр дундаа өсвөрийн хүүхдүүд маань хөлбөмбөгийн спортод сэтгэл зүрхээ зориулж эхэлсний тод жишээ нь зургаан сарын хугацаанд 30 гаруй мянган тамирчныг хамруулсан “Дуулиан-2020” тэмцээн юм.”
-Цаашид “Дуулиан-2020” тэмцээний хамрах цар хүрээг өргөжүүлэх талаар ямар нэгэн яриа хэлцэл хийгдэж байгаа юу?
-Манай ТББ-ын Удирдах зөвлөл ярилцаад “Дуулиан-2020” тэмцээнд оролцож буй бүх талуудыг оролцуулсан чуулган зохион байгуулахаар төлөвлөж байна.
Дуулиан-2020 тэмцээн 2014-2015 оны аварга багуудаа тодруулахаас гадна улирлын шилдгийн шилдэг тамирчнаар Ерөнхий боловсролын 20-р сургуулийн сурагч Б.Тэмүүжинг тодруулжээ. Өмнө нь тус тэмцээний шилдгээр тодорч байсан А.Мөрөн өдгөө Монголын анхны хөлбөмбөгийн легониор тоглогч болоод байгаа билээ. “Дуулиан-2020” тэмцээний шилдгийн шилдэг тоглогч Б.Тэмүүжин “Би хөлбөмбөгийн спортоор хичээллээд 7 жил болж байна. Дуулиан-2020 тэмцээнд 11 настайгаасаа эхлэн оролцож эхэлсэн. Одоогоор би зөвхөн заалны хөлбөмбөг бус ногоон талбайд мэргэжлийн клубд харьяалагдаж тоглодог. 20-р сургуулиа төлөөлж “Дуулиан-2020” тэмцээнээс өмнө нь хүрэл медаль хүртэж байлаа. Харин энэ жил 17 насны ангилалд баг хамт олноороо алтан медал хүртэж тэмцээний шилдгийн шилдэг тамирчин болсондоо туйлын их баяртай байна. Жил жилийн шилдгээр тодорч байсан ах нарынхаа амжилтын түүчээг үргэлжлүүлэх болно” гэсэн юм.
Тэмцээний хаалтын ажиллагаанд зориулан нийслэлийн удирдлагууд болон ивээн тэтгэгч аж ахуй нэгжүүдийн захирлууд оролцсон нөхөрсөг тоглолт болжээ. Тоглолтод хүндэт зочдоос бүрдсэн баг, 15 насны шигшээ багийн эсрэг нөхөрсөг тоглолт хийсэн нь есөн жилийн түүхтэй Дуулиан-2020 тэмцээнд шинэ уламжлал тогтоосон үйл явдал боллоо.
Дуулиан-2020 тэмцээний хөвгүүдийн багийн аваргууд
-11 нас Хүчит чулуут ХХК ивээн тэтгэгчтэй 24-р сургууль
-13 нас Хас банк ивээн тэтгэгчтэй 40-р сургууль
-15 нас ХХбанк ивээн тэтгэгчтэй 14-р сургууль
-17 нас I Concept ХХК ивээн тэтгэгчтэй 20-р сургууль
-20 нас МҮИС-ийн баг
Дуулиан-2020 тэмцээний охидын багийн аваргууд
-11 нас Ард даатгал ивээн тэтгэгчтэй 107-р сургууль
-13 нас Миг даатгал ивээн тэтгэгчтэй 92-р сургууль
-15 нас 57-р сургуулийн баг
-17 нас 41-р сургуулийн баг
-20 нас МУБИС
