Баянгол дүүргийн 14 дүгээр хороо, 16 дугаар байр нь хөрсний гулгалтанд өртөж болзошгүй мэдээллээр дүүргийн Онцгой комисс болон нийслэлийн Онцгой комисс хуралдан тус байрны иргэдийг нүүлгэн шилжүүлэх шийдвэр гаргасан талаар бид мэдээлсэн.

Аврах ажиллагааны талаар НОБГ-ын хэвлэл мэдээллийн ажилтан Р.Бурмаагаас тодрууллаа.

-Аврах ажиллагаанд нийт хэчнээн алба хаагч оролцсон бэ?

-Өчигдөр шөнийн 20:00 цагт ажиллагааг эхлүүлсэн юм. Тус ажиллагаанд дүүргийн Онцгой комиссоос 21 албан хаагч Онцгой байдлын хэлтсээс 41 албан хаагч, Цагдаагийн хэлтсээс 50 албан хаагч, Мэргэжлийн хяналтаас 40 албан хаагч, Ус дулаанаар хангах албанаас 4 албан хаагч, Эрчим хүчээр хангах албанаас 6 албан хаагч, Эрүүл мэндийн нэгдлээс 4 албан хаагч, Прокуророос 2 албан хаагч, 14 дүгээр хорооноос 5 албан хаагч оролцсон.

-Нийт хэчнээн оршин суугчийг нүүлгэн шилжүүлэв?

- Тус байрны нийт 244 оршин суугчдаас 178 иргэнийг 7 зочид буудалд хуваан байрлуулж халуун хоол ундаар хангасан. Нүүлгэн шилжүүлэх ажиллагаа 23:37 цагт дуусч бүх байрнуудын хаалгыг лацдан жижүүрийн бүрэлдэхүүнд хүлээлгэн өгсөн байгаа.

-Одоогоор жижүүрийн бүрэлдэхүүнд хэчнээн алба хаагч томилогдсон байгаа вэ?

-Жижүүрийн бүрэлдэхүүнд цагдаагийн 15 албан хаагч, онцгой байдлын хэлтсээс 2 албан хаагч, замын цагдаагаас 2 албан хаагч, мэргэжлийн хяналтаас 1 албан хаагч үүрэг гүйцэтгэж байна.    

Д.Ундрах /24tsag.mn/