Манайд уран олборлодог Канадын “Хан Ресурс” компанийн дарга Жим Доак монголд амиа алдсан тухай эх сурвалж мэдээллээ. 59 настай Жим Доакын цогцсыг өчигдөр өглөө "Bluesky" зочид буудлын өрөөнөөс нь олсон байна.

Тэрээр компанийнхаа албан үүргийн дагуу өнгөрсөн долоо хоногт монголд ирээд байжээ. Түүнтэй хамт “Хан Ресурс”-ын Ерөнхийлөгч, Гүйцэтгэх захирал Грант Эдэй монголд ирж, нэг зочид буудалд байршиж байсан аж.

Одоогоор түүний үхлийн шалтгааныг тогтоож амжаагүй бөгөөд цогцсын задлан шинжилгээ хийхээр төлөвлөөд байгаа юм байна. "Bluesky" зочид буудалд байрлаж байсан түүнийг ямархуу байдалтай олдсон, хэн анх цогцсыг олсон зэрэг мэдээллийг манай холбогдох албаныхан нууцалж байна.

Хэргийн тухай “Хан ресурс” компаниас тодруулахаар залгатал утсаа авахгүй байлаа.

Харин энэхүү дуулиант хэргийг орон нутгийнх нь ганц хоёр хэвлэл нэлээд хардсан шинжтэй бичжээ.

Тэд Арбитрын олон улсын шүүхэд шилжсэн уран олборлолтын лицензийн маргааны асуудлаар Монголын Засгийн газар “Хан Ресурс” компанид ялагдаж, өнгөрсөн гуравдугаар сард 100 сая ам.долларын хохирлыг барагдуулах болсон гэжээ. Мөн гурван жил үргэлжилсэн уг маргаан шийдэгдсэнээр Монголын талд томоохон цохилт болж, хэвлэл мэдээллийн хэрэгслүүдээр шүүмжилсэн нийтлэл ихээр гарч байсан хэмээн онцолжээ. Түүнчлэн Жим Доак монголд ирэхийн өмнө Арбитрын шүүхийн ялалтад баярлаж буйгаа илэрхийлж байсан хэмээн нийтэлсэн байна.

Канадын хэвлэлийн нийтлэлд Жим Даокыг бараг л дээрх ялагдлын хонзонгоор хөнөөсөн байж мэдэх гэсэн хардлага, өнгө аяс харагдаж байлаа.

Тэрээр дөрвөн хүүхдийн эцэг. Ажил мэргэжлийн хувьд санхүүгийн шинжээчээр 25 жил ажиллажээ. 2002 оноос хойш “Хан Ресурс”-ын салбар “Managing Partner of Megantic Asset Managemen”t хэмээх Торонтод байрлах компанийн Ерөнхийлөгчөөр ажиллаж, энэ үүргээ 12 дахь жилдээ амжилттай биелүүлж иржээ.

Жим Доак өмнө нь “Cascades”, “Purepoint” уран олборлолтын групп, “Eurocopter Canada”, “PetroKazakhstan”, “Superior Propane”, “Spar Aerospace”, “ScotiaMcLeod”, “First Marathon Securities”, “McLeod Young Weir” зэрэг орон нутгийн болон олон улсын томоохон компаниудад захирал, гүйцэтгэх захирал, хэлтсийн дарга, санхүүгийн шинжээч гэх мэт албыг хашиж байжээ.

Мөн тэрээр 1997 онд “Enterprise Capital Management” компанийг үүсгэн байгуулж 2002 он хүртэл удирдах үүргийг гүйцэтгэсэн байна.

Тэрээр өнөөг хүртэл Канадын томоохон хэвлэлүүдэд эдийн засгийн тухай өгүүлэл, тойм бичиж хэвлүүлдэг байжээ. Бүр зарим хэвлэлд гэрээт тоймчийн үүрэг гүйцэтгэж байсан байна. Энд түүнийг Торонтогийн санхүүгийн шинжээчдийн нийгэмлэгийн тэргүүнээр ажиллаж байсныг хэлэх хэрэгтэй.

Толгойтой хүн хэмээн нэрлэгддэг Жим Доак Торонтогийн их сургуулийг эдийн засагчаар төгсөж, McGill их сургуульд дараагийн зэргээ хамгаалжээ.

Талийгчийн “West Face Capital”-ийг хамтран байгуулагч, дотны анд Грег Боланд нь “Энэ хэрэг гадаадын засгийн газруудад тэднийх биш байсан зүйлийг авахад хэцүү гэдгийг харуулж байна” хэмээн ярьжээ.

Мөн санхүүгийн шинжээч Петер Фостер “Тэр маш гайхалтай хүн байсан. Олон буяны ажил зохион байгуулсан. Бас уншигчдын хайртай нийтлэлч байсан” гэжээ.

Канадын хөрөнгө оруулалттай “Хан ресурс” ХХК нь 2006 оноос эхлэн манай улсад үйл ажиллагаагаа явуулж эхэлжээ. Дорнод аймагт үйл ажиллагаагаа эхэлснээс хойш гурван жилийн дараа буюу 2009 онд Цөмийн энергийн тухай хууль батлагдахад шинээр бүртгүүлэх хүсэлтээ гаргаагүй, мөн Мэргэжлийн хяналтын байгууллагын санал дүгнэлтийг үндэслэн тухайн үеийн Засгийн газар тусгай зөвшөөрлийг нь цуцалжээ. "Хан ресурс" Засгийн газрын эсрэг 2011 оны нэгдүгээр сард 326.0 сая ам.долларын нөхөн олговор олгохыг шаардаж, Арбитрын шүүхэд хандсан бөгөөд уг хөрөг өнгөрсөн гуравдугаар сард тус компанийн талд шийдвэрлэгдсэн юм.

Монголын Засгийн газар одоо "Хан Ресурс"-т 100 сая ам.доллар төлөх өртэй.

Д.Идэр

www.24tsag.mn