Баян-Өлгий аймгийн Цэнгэл сумын Хар-Уул багийн “Алтай таван богд” ууланд авиралт хийж байсан 5 залуу ор сураггүй алга болоод гурав хонож байгаа талаар бид өмнө нь мэдээлж байсан.

Тэднийг эрэн хайх ажиллагааг Баян-Өлгий аймгийн онцгой байдлын газрын бие бүрэлдэхүүн  зэргэлдээх аймаг болох Ховд, Увс аймгийн онцгой байдлын газрын  уулчин аврагчид, “Монгол экспедишн” компанийн уулчидтай хамтран явуулж байна.

Албаны хүмүүсийн өгч буй мэдээллээр сураггүй болоод буй 5 залуу МУГТ Г.Өсөхбаяртай хамт ууланд авирч яваад салцгаасан байна. Энэ жил Алтай Таван Богд ууланд авиралт хийсний 100 жилийн ой тохиож байгаа бөгөөд үүнд зориулсан авиралтад Монголын өнцөг булан бүрээс, хилийн чанадаас олон уулчин, клуб нэгтгэлээс зохион байгуулж авиралт хийж байгаа аж. Сураггүй болсон таван хүн аль нэг клуб, нэгтгэлийн зохион байгуулалтад хамрагдаагүй, сайн дураараа оролцож байгаа боловч урд өмнө ууланд авиралт хийж байсан туршлагатай уулчид юм байна.

Өчигдрөөс МУГТ Г.Өсөхбаяр өөрийн гэсэн баг бүрдүүлэн залуусыг эрэн, хайх ажиллагаанд гар бие оролцож эхэлжээ.

ОБЕГ-аас энэ талаар "Эсэн мэнд байх найдвар тааруу байна. Гэхдээ эцсийн байдлаар уулчдыг нас барсан гэж тогтоогоогүй" гэж хэлсэн байна.

Харин ар гэрийнхэн Шадар сайд У.Хүрэлсүхийг идэвхтэй ажиллахгүй байна. Таван иргэн нь ор сураггүй алга болчихоод байхад нисдэг тэрэг ч гаргаж өгсөнгүй гэлээ.

24tsag.mn