Хотын дарга Х.Нямбаатарын охин Н.Мишээл нь стейк идэж, шар айраг уудаг Гэнсэй гэх нохойтой тухай мэдээлэл гарсан. Тэгвэл уг нохой нь ямар үүлдрийн, ямар үнэтэй нохой юм бол? Бүгдээрээ мэдэцгээе.
Уг нохой нь 2020 оны гуравдугаар сарын 09-нд Чехийн Параг хотод мэндэлжээ. Японы Акита үүлдрийн нохой юм.
Японы уугуул үүлдэр болох "Акита ину" нохой нь дэлхий даяар үнэнч, тайван зан чанараараа танигдсан. Анх Японы хойд бүсийн уулархаг нутагт бий болсон энэ үүлдэр өнөөдөр гэр бүлийн хамгаалагч, итгэлт анд болжээ. Акита нь анх анчдын нохой байсан бөгөөд баавгай, зэрлэг гахай зэрэг том амьтдыг агнахад ашиглагддаг байв. Түүхийн явцад тус үүлдэр Японы соёлд онцгой байр суурь эзэлж, 1931 онд үндэсний дурсгалт амьтан хэмээн зарлагджээ.
Акита нохойн үнэнч зан чанарыг илэрхийлсэн хамгийн алдартай жишээ бол Хачико юм. Тэрээр эзнээ нас барсны дараа ч олон жилийн турш галт тэрэгний буудал дээр хүлээж байсан түүх нь дэлхий нийтийн сэтгэлд хүрсэн.
Биеийн хувьд том биетэй, зузаан ноостой тул хүйтэн цаг агаарт тэсвэртэй. Чих нь босоо, сүүл нь эрчлээстэй байдаг нь түүний онцлог төрхийг бүрдүүлдэг. Мөн улаан, цагаан, судалтай зэрэг олон өнгөтэй байдаг. Зан чанарын хувьд эзэндээ маш үнэнч, тайван, дөлгөөн, хамгаалах зөн өндөр, танихгүй хүнд болгоомжтой ханддаг.
Гэсэн ч мэргэжилтнүүдийн үзэж байгаагаар Акита нохой нь бие даасан, заримдаа зөрүүд зан гаргах хандлагатай тул туршлагатай эзэнд илүү тохиромжтой аж. Мөн багаас нь зөв сургалт, хүмүүжлийн арга хэрэглэх хийх шаардлагатай байдаг.
Сүүлийн жилүүдэд Монголд ч Акита үүлдрийн нохой тэжээх сонирхол нэмэгдсэн. Үнийн хувьд нэг гөлөг нь 1000-3000 ам.доллар байдаг. Гэвч яг Япондоо байдаг цэвэр цусны удам нь 4000-6500 ам.долларт хэлбэлздэг ажээ. Насан туршийнх нь амьжиргааны өртөг 21 мянган ам.доллар байдаг гэж судлаачид үзэж байна.
Л.Баяр
Сэтгэгдэл (18)