Хил хамгаалах Ерөнхий газраас /ХХЕГ/ улсын зардлаар жил бүр ОХУ-ын Кургон, Калининград хот руу сонсогчдоо явуулдаг. Сонсогчид 5 жил суралцаж төгсөөд эх орондоо ирж ажилладаг аж. Тэгвэл Үндэсний их баяр наадмаар ХХЕГ-аас томилогдон ОХУ-ын Кургон хотын Хилийн албаны дээд сургуульд суралцаж байсан хоёр оюутан усанд живж амиа алдсан хэрэг гарчээ. Талийгаачид энэ сарын 13-ны өдөр баяр наадмын өдөр таарсан учир голын эрэгт амарч байжээ. Улмаар сэлж байгаад живж, нөгөөх нь аврахаар ороод ийнхүү хоёулаа осолдсон байна. Осолдсон сонсогчид дэд түрүүч, түрүүч цолтой. Энэ жил дөрөвдүгээр курсээ төгсөн ирэх намар 5 курст орох байсан аж.

Д.Дуулим