Иргэн бүрт 1,5 сая төгрөг олгох арга хэмжээний хүрээнд эхний ээлжинд Улаанбаатар хотын ахмад настан, хөгжлийн бэрхшээлтэй иргэдэд 330 мянган төгрөг олгохоор болоод байгаа. Өнөөдрөөс энэ мөнгийг тарааж эхэлсэнтэй холбоотойгоор Сангийн яамны Хүний хөгжил сангийн ажлын албаны мэргэжилтэн Ц.Зоригтбатаас доорх тодруулгыг авлаа.

- Сая төгрөгийг дөрөв, тав, зургаадугаар сард гурав хувааж өгөхөөр болоод байгаа. Өнөөдөр хэддүгээр сарын мөнгийг өгч эхлэх вэ?
- Хүний хөгжил сангийн 2012 төсвийн тухай хууль, УИХ-ын 2011 оны 53-р тогтоолоор нэг сая төгрөгийг ахмад настан болон хөгжлийн бэрхшээлтэй иргэдэд олгохоор болсон. Энэ дагуу Засгийн газар эдгээр иргэдэд сая төгрөгийг дөрөв, тав, зургаа дугаар сард гурван удаа тэнцүү хувааж өгөхөөр тогтоосон байгаа. Өнөөдрөөс эхэлж Улаанбаатар хотын төвийн зургаан дүүргийн ахмад настан, хөгжлийн бэрхшээлтэй иргэдэд олгох эхний 330 мянган төгрөгийг өгч  эхлээд байна.
  Хүний хөгжил сангийн 2012 оны төсөвт ахмад настан хөгжлийн бэрхшээлтэй иргэдийн  тоог 334,2 мянган хүнээр тооцож төлөвлөсөн байсан. Одоогийн байдлаар 287,7 мянган ахмад настан, хөгжлийн бэрхшээлтий иргэд сая төгрөгөө бэлэн мөнгөөр авах хүсэлтээ гаргасан байгаа.

- Тэгвэл хөдөө орон нутагт амьдарч байгаа ахмад настан, хөгжлийн бэрхшээлтэй иргэд хэзээ 330 мянган төгрөгөө авах вэ?
- Цаашид Хүний хөгжил санд төвлөрөх урьдчилгаа төлбөрийн орлоготой холбоотой зохицуулалтыг хийж байгаа. Сангийн сайдын баталсан төсвийн хуваариар ахмад настан, хөгжлийн бэрхшээлтэй бүх иргэдийн мөнгийг зургаадугаар сард багтаан олгож дуусах хуваарьтай байгаа.

 - Үлдсэн тав, зургаадугаар сарын мөнгийг хэзээ өгөх вэ?
- Цаашдаа урьдчилгаа төлбөр хэрхэн төвлөрөхөөс хамаарч зохицуулалт хийж олгоно.

- Өнөөдрөөс өгч эхэлж байгаа 330 мянган төгрөгийг хаанаас, ямар бичиг баримт бүрдүүлж авах вэ? Хэзээ хүртэл өгөх вэ?
- Хүний хөгжил сангийн мөнгө буюу 21 мянган төгрөг авч байсан банкаасаа очиж авна. Тэгэхдээ Хүний хөгжил сангийн дэвтэр болон иргэний үнэмлэхтэйгээ очих хэрэгтэй. Мөнгөө авах гэж иргэд тэгэж их яарах хэрэггүй. Ойрын өдрүүдэд авахад л болно.