Өчигдөр Энэтхэгийн өмнөд хэсэгт зорчигчийн галт тэрэг, зогсоолд байсан ачааны галт тэрэгтэй мөргөлдөж, шатсанаас 25 хүн амиа алдаж, хэдэн арван хүн бэртжээ. Аврах ажилтнууд галт тэрэгний ослоос амьд үлдсэн зорчигчдыг авран гаргахын тулд зургаан цаг ажилласан юм. Осол Энэтхэгийн Андра Прадеш мужид гарсан байна. Эмнэлгийн ажилтнууд ослын газарт очиж, гэмтэж бэртэн, цочролд орсон хүмүүст яаралтай тусламж үзүүлж, ус аваачиж өгсөн байна. Ослын газар нүд халтирам аймшигтай байсан бөгөөд хүүхдүүдээ хайсан эцэг эхчүүд цөхрөнгөө баран уйлж байжээ. Гэмтэж бэртсэн 40 гаруй хүнийг эмнэлэгт яаралтай хүргэсэн. Орон нутгийн цагдаагийн ажилтнуудын мэдээлснээр 10 хүний биеийн байдал маш хүнд байгаа. Зорчигчийн Хампи Экспресс галт тэрэгний машинист зам дээр нь ачааны галт тэрэг зогссоныг хараад дохио өгч зогссон боловч энэ нь хэтэрхий оройтсон байжээ. Хоёр галт тэрэг мөргөлдсөний дараа гал гарч, галт тэрэгнээс гарч чадаагүй 16 хүн шатаж нас баржээ.
