Энэ жилийн сонгуульд өрсөлдөгчид бараг эцсийн байдлаар тодорлоо. Гэвч олны анхаарлын төвд байсан эрхэмүүд нэр дэвшилгүй үлдлээ. Олон сонгуулийг удирдаж, тэр бүртээ ялалт байгуулж ирсэн С.Баяр УИХ-ын сонгуульд нэр дэвшсэнгүй. Тэрээр эрүүл мэндийн шалтгаанаас болон эхлээд Ерөнхий сайдын албаа, дараа нь намын даргын ажлаа өгсөн. Одоо УИХ-ын гишүүнээсээ татгалзаж байгаа бололтой. Ингэснээр нэг хэсэгтээ улс төрөөс холж байж биеэ эмчлүүлэх гэнэ. Одоо тэрбээр АНУ-д эмчлүүлж байгаа аж. С.Баяр намынхаа нэр дэвшигчдэд баярын цахилгаан ч илгээсэнгүй. Уг нь түүнийг листийн эхний тавд бичигдэнэ гэж таамаглаж байсан юм. Таамаглал талаар боллоо. Ийнхүү МАН-ын хамгийн нөлөө бүхий эрхэм улс төрөөс холдож байгаа нь анхаарал татаж байна. Ирэх ерөнхийлөгчийн сонгуульд нэр дэвшинэ гээд гэнэт гараад ирэхгүй л бол шүү дээ.
МАН-аас нэр дэвшилгүй үлдсэн хоёр дахь содон хүн бол Т.Бадамжунай. Уг нь тэрээр өөрийн төрөлх нутаг Архангай аймагт нэр дэвшихээр бараг сүүлийн хоёр жил бэлдсэн. Гэвч эцсийн мөчид нэрээ татаж өөрийн гарын залуучуудаа түлхжээ. Үүнийгээ залуучуудад боломж олгож байна хэмээн тайлбарласан аж. Үнэн эсэхийг цаг хугацаа л харуулах байх. Харин тэрээр НИТХ-ын сонгуулийг зохион байгуулахад удирдаж оролцох бололтой.
Хамгийн харамсалтай хүн нь БОАЖ-ын сайд Д.Цогтбаатар. МАН-ын хамгийн нэр цэвэр залуусын нэг. Сайд болоход ч олон нийт дэмжиж байсан. Тэрээр Сүхбаатар дүүрэг, Дундговь аймаг хоёрт нэр дэвшихээр бэлдсэн ч хоёр туулай хөөсөн хүн хоосон үлддэг гэдгийг харууллаа. Сүхбаатар дүүрэгт эмэгтэйчүүдийн квот нэрээр Ц.Цогзолмаа орж ирснээр шахагджээ. Ингээд нийслэлд шансгүй болж. Харин Дундговь Б.Амарсанаа гэж найзыг нь сүүлийн жилүүдэд ажилласан гэдэг шалтгаанаар У.Хүрэлсүх татаж, тойрог өгчээ. Ингээд МАН-ын залуу сайд Д.Цогтбаатар тойроггүй торойж үлдлээ.
МАН-ын нэр дэвшилгүй үлдсэн содон гурван хүн гэвэл эднийг нэрлэж болохоор байна.
Холбоотой байя!
www.24tsag.mn
www.24tsag.mn
