Ардчилсан нам ичдэггүй юм байх даа. Энэ намаас сонгогдсон ерөнхийлөгч Ц.Элбэгдорж,  Монгол улсын анхны ерөнхийлөгч П.Очирбат гуай ч энэ гэрээний ач холбогдлыг олон нийтэд байнга сануулж, үнэлэж байдаг билээ. Одоо энэ намын дарга Н.Алтанхуяг болон бүлгийн дарга Ч.Сайханбилэг нараа очоод асуусан санал нэгтэй байгаа. 2009 оны аравдугаар сарын 6. Оюутолгойн орд ашиглах гэрээнд “Айвенхоу Майнз Монголиа Инк” компанитай Монгол Улсын Засгийн газрыг төлөөлж Сангийн сайд С.Баярцогт, Эрдэс баялаг, эрчим хүчний сайд Д.Зоригт, Байгаль орчин, аялал жуулчлалын сайд Л.Гансүх гарын үсэг зурлаа. Хоёр нам хамтран байж гэрээг баталгаажуулахыг хүлээн зөвшөөрсөн өдөр. Түүхэн гэж онцлохоос өөр арга байхгүй. Монголчуудын хувьд урд өмнө хийж байгаагүй гэрээ байлаа.  Монгол Улсын Ерөнхийлөгч Ц.Элбэгдорж тухайн сайдууд болон Засгийн газарт, УИХ-д, нийт ард түмэндээ хандаж баяр хүргэж байлаа. Шарлаж амжаагүй сонины хуудаснаас, телевизүүдийн фондноос тэр баярт мөчүүдийг эргүүлэн харж болно. Ардчилсан нам, МАН хоёр хамтарч Засгийн газарт ажиллаж байхдаа Оюутолгойн гэрээг өөд уруугуй магтаж  амаа олохгүй явсан цаг жил хүрэхгүйн өмнө. Үнэхээр ч Оюутолгойн гэрэ бол дэлхийд үнэлэгдсэн сайн гэрээ болсон. Үүнийг олон хүн хэлдэг. Ирэх жилээс Оюутолгойн олборлолт эхэлнэ. Бүтэн гурван жилийн турш үргэлжилсэн нүсэр бүтээн байгуулалтад 9250  монгол хүн оролцож, түүний ард тавь гаруй мянган хүний амьдрал баталгаажчихлаа. Тэдгээр 9000 гаруй иргэдийн ард  өчнөөн айлын амьдрал бий.  Тэгэхээр Оюутолгойн гэрээг зөвхөн урьдчилгаа болгон авсан 250 сая ам.доллараар хэмжих гэж үү. Зөвхөн Оюутолгойгоор хөрөнгө оруулалтын гэрээнүүд хязгаарлагдахгүй. Гэтэл Ардчилсан нам Засгийн газраас гарангуутаа найзуудаа мурьж эхэлсэн. Одоо сонгууль ойртсон энэ үед бүр хүчтэй муулах болов. Өөрсдөө амиа тавих шахан батлуулсан гэрээгээ муучилж ЭБЭХ-ний сайд Д.Зоригт болон холбогдох хүмүүсийг “эдийн засгий алуурчин” хэмэн цоллож эхэллээ.
   
   Гэтэл Ардчилсан намын хэдхээн нөхдүүд амин хувийн эрх ашгаа улс эх орны эрх ашгаас дээгүүрт тавьж сонгогчдоос санал авахын тулд хоол идэж байгаа тогоо руугаа нулимаж байгаа нь харамсалтай. Оюутолгой,  Оюутолгойн гэрээ бол  Монголын эдийн засгийг  багаар бодоход 20 жил үүрч ард түмний амьдралыг өөд нь татах ёстой юм. Нэг ёсондоо бидний хоол идэж буй тогоо юм. Гэтэл тогоогоо нулимах  эрх ашиг Ардчилсан намд байх ёсгүй.   Хэрвээ Оюу толгойн гэрээг байгуулахад алдаа гарсан бол хоёр нам хоёулаа л ард түмнийхээ өмнө хариуцлага хүлээх ёстой.  Гэвч одоогоор лав алдаа гараагүй байна. Харин ололт дэвшил харагдаж ядуурал буурч ард түмэн ашгийг нь эхнээсээ хүртэж эхэллээ. Ийм байхад ачааны хүндийг үүрч ашгийг нь түмэн олонд хүртээхийн төлөө ажилласан сайдыг элдвээр зүхэж хараах нь хүмүүст таалагдахгүй байна.  Иргэн бүрт 1.5 сая төгрөг олгоно гэж хоёр нам хоёулаа амалсан байх аа.   Гэтэл энэ мөнгийг олох, хувьцааг нь арилжаалах үүргийг бас л хоёулаа үүрэх ёстой.  Гэвч зовох цагт нөхрийн чанар танигддаг гэдгийн үлгэрээр Ардчилсан нам замын дундаас буцсан. Хүнд хэцүү замаас ухарч амар хялбар амьдрал хөөсөн ч тэд хамтарч байгуулсан гэрээгээ, хамтарч алхсан замаа, хамтдаа эхлүүлсэн эдийн засгийн өсөлтөө нулимаж, шаварт хутгах гэж оролдох нь зохимжгүй юм. Ардчилсан намынхан ч гэсэн энэ сонгуулиар Оюутолгойн гэрээг  ярьж, түүгээр бахархаж орох нь дамжиггүй. Хэрвээ энэ гэрээ батлагдаагүй бол өнөөдөр ард түмэн цалингаа нэмүүлж чадахгүй, тэтгэвэр өсөхгүй, иргэн бүрт хувьцаа хувь хишиг олдохгүй, 21 мянган төгрөгөө авч чадахгүй, оюутнууд сургалтын төлбөрийн 500-гаа авч чадахгүй байсан. Ийм саарал амьдралыг хэн хүсэх вэ? Ард түмэн лав хүсэхгүй. Ардчилсан холбоо эвсэл төр барьж байсан 1996-2000 оныг дахин авчрах хэрэггүй биз.