Цагдаагийн экс дарга нарын буюу хошууч генерал Ч.Амарболд, хурандаа О.Зоригт, Ш.Батсүх, дэд хурандаа Г.Ганбаатар нарт холбогдох хэргийн шүүх хуралдааныг энэ сарын 29-ний өдөр буюу ирэх мягмар гаригийн 10.00 цагт Сүхбаатар дүүргийн шүүхэд товлогдоод буй. Нийслэлийн Өмгөөлөгчдийн зөвлөлөөс Ч.Амарболдын өмгөөлөгчөөр Ж.Батхүү, О.Зоригтын өмгөөлөгчөөр А.Ундрах, Ш.Батсүхийн өмгөөлөгчөөр М.Алтан-Өлзий, Г.Ганбаатарын өмгөөлөгчөөр Б.Баяр нарыг томилсон. Өмгөөлөгчид хэргийн материалтай танилцаж байгаа бөгөөд одоогийн байдлаар зарим нь 29 хавтаст хэргээс 10 хавтаст хэрэгтэй нь танилцсан ажээ.
Тиймээс тус өмгөөлөгчид ирэх мягмар гаригт болох шүүх хурлыг цалгардуулахгүй үүднээс амралтын өдрүүдээр буюу энэ сарын 26-27-ны өдрүүдэд хэргийн материалтай танилцах хүсэлтийг Сүхбаатар дүүргийн шүүхэд гаргасан байна. Шүүх энэ хүсэлтэд хүндэтгэлтэй хандан хүлээн авч хэргийн материалтай танилцуулахаар болжээ. Ийнхүү цагдаагийн дарга нарын өмгөөлөгчид амралтын өдрүүдээр ч хавтаст хэрэгтэй танилцах юм байна.
