1. УИХ-ын гишүүн Ш.Сайхансамбуу 1959 оны зургадугаар сарын 5-нд Завхан аймгийн Баянтэс суманд төрсөн. Тэрбээр өдгөө 53 настай. 2. Ам бүл дөрвүүлээ. Эхнэр болон хүү охин хоёртойгоо амьдардаг. Түүний хүүг С.Наранбат, охиныг нь С.Эрдэнэтуул гэдэг. Тиймээс хоёр хүүхдийнхээ нэрийг оролцуулан “Нарантуул” захаа нэрлэсэн байдаг.
3. Ш.Сайхансамбууг гурван настай байхад тэднийх Улаанбаатарт шилжиж иржээ. Тэрээр хүүхэд насаа Гандангийн дэнж дээр өнгөрөөж, “Би олон лам нарын ном хурахыг харж, бас тэдний гар хөлийн үзүүрт зарагдаж гүйдэг байсан, тиймдээ би өдий зэрэгтэй яваа гэж залбирдаг” гэдэг.
4. Анх долдугаар ангиа төгсөөд, зуныхаа амралтаар дэлгүүрт ачигч хийж 14-тэйдээ анхны цалингаа авч байжээ. Сарын 260 төгрөгийн цалин авдаг байсан бөгөөд өөрийгөө бүрэн хувцаслачихна. Дээрээс нь дүү нарынхаа хичээлийн хэрэгслийг бэлдээд өгчихдөг байжээ.
5. Тэрээр 10 жилээ Улаанбаатар хотын 20 дугаар дунд сургуулийг төгссөн. Политехникийн сургуульд суралцсан. Инженер мэргэжилтэй.
6. Англи, орос, герман хэлтэй.
7. Улаанбаатар хотын гэр ахуйн модон эдлэлийн үйлдвэрт мужаан, эсгүүрчин, Орон сууц, нийтийн аж ахйун газарт инженер, Улаанбаатар хотын АДХ-ын Гүйцэтгэх захиргаанд мэргэжилтэн, “Нарантуул” ХХК-д Ерөнхий захирал, Улсын Их Хурлын гишүүн хийж байжээ.
8. Хөдөлмөрийн гавьяаны улаан тугийн одонтой.
9. Гадуур хооллох сонирхолгүй гэртээ тогоо, шанагатайгаа ноцолдон хоол, цай хийж байдаг сонин нөхөр хэмээн хэвлэлээр бичсэн байдаг.
10. Эхнэртэйгээ нэгдүгээр курс төгссөн зунаа Горхитын амралтанд геодезийн дадлагад гарсанаар учирсан гэдэг. Түүнтэй нэг ангид байсан боловч зуны дадлагаар л бие биенээ ойлголцож, хоёрдугаар курстээ 40 мянгатад хадмындаа орж суужээ. Эхнэртэй болсон оюутан хархүү амьдралын эрхээр цусаа өгдөг байжээ.
11. Хоёр сар болоод л 400 грамм цус өгөхөд 180 төгрөгтэй болчихно. Тэр зургаан литр цус өгөөд “ Хүндэт донор”-ын болзол хангаж байжээ.12. Мөн Алдарт “Пан” Цогоо, “S” Гантөмөр нартай мөр зэрэгцэн “Дэнжийн 1000” –ын зах дээр зогсдог байжээ. Оросуудаас бензин авч таксины жолооч нарт заран, мөн л Оросуудаас гэрийн тавилга авч комиссийн дэлгүүрт заруулахад дор хаяад л 1000 төгрөг унадаг байсан гэдэг. Тэр Улаанбаатарт “Волга-2410” унадаг басан цөөхөн хүмүүсийн нэг. 1987 онд актлагдсан “Волга 2410” машиныг 21300 төгрөгөөр худалдан авч байсан нь тэр үеийн хур баяны хийдэг наймаа гэж болно. Ш.Сайхансамбуу ажлынхаа чөлөө заваар “2410”-аараа таксинд явна. Таван хүнтэй Дархан ороод ирэхэд л 500 төгрөг. Бараг л сарын цалин гэсэн үг.
13. Хоёрдугаар курстээ олуулаа дарвиж яваад цагдаа алгадчихсан нь балрах шахсан гэдэг. Нөгөөх цагдаа гомдолтой гэсэн учраас мөрдөн байцаагч түүнд эрүү үүсгэн шүүх хурал нь болжээ. Харин шүүхээс “ чи залуу хүн байж энэ оюутны амьдралаар тоглоод яахав дээ” гээд 150 төгрөгөөр торгож байсан аж.
14. Нэгэн цагт шинэ зах босгоход зээл олгохоор ирсэн Дрезднер банкны төлөөлөгч хүн зон зүү орох зайгүй сүлжилдэх их захыг харчихаад “Энэ чинь мөнгөний машин байна” гэж дуу алдсан гэдэг.
15. “Мөнгөний машин” гэгддэг энэ эрийн мэдэлд “Нарантуул” ХХК, “Нарантуул” зочид буудал, Орос-Финландыг холбосон модны бизнес, Шанхайд 45 сая еврогоор боссон шилний үйлдвэр, SS klub байдаг.
16. Сибирийн модыг цаасны эх орон Финланд руу гаргаж, Шанхайд 45 сая еврогоор супер шилний үйлдвэр босгосон гээд энэ эрхэмд биднээс үл хамааран гүрэн дамжсан бизнес ч бас бий.
17. Би бол иргэдээс төрсөн тэрбумтан хэмээн нэгэн ярилцлагандаа дурьджээ.
18. 2008 оны УИХ-ын сонгуулийн 9-р тойрогт МАХН-аас нэр дэвшиж, Завханчуудын итгэлийг авч, УИХ-ын гишүүнээр сонгогдсон.
19. Тэрээр УИХ-д орсноо “Би 20 шахам жил бизнес хийсэн байна. Тэгэхээр одоо дахиад л бизнесээ өргөжүүлэх гээд, салбар байгуулах гээд зүтгээд байх мөрөөдөл дуусчихаад байна. Надад нэмж юм хийгээд байх шаардлага алга. Хүний хүсэл мөрөөдөл хязгааргүй ч гэсэн аливаа зүйл хэмжээ хязгаартай. Би хэмжээ хязгаараа мэдрээд байна. “Сайхансамбуу, одоо болно оо” гэж өөртөө хэлчихээд улс төр лүү орсон” гэдэг.
20. УИХ-д ороод Эрүүгийн тухай хуульд өөрчлөлт оруулах ажлыг хийлгэсэн юм.
21. Тэрээр төрийн ордонд Б.Бат-Эрдэнэ Д.Балдан-Очир гишүүн нар луу салаавч гаргаж байв. 22. Харин үүнийгээ “Үүдний өрөөнд Б.Бат-Эрдэнэ, Д.Балдан-Очир хоёртой л тоглож байсан юм. Б.Бат-Эрдэнэ л миний зургийг дараад байсан юм” хэмээн тайлбарлаж, ард түмнээс уучлал гүйж байсан.
23. Харин Ш.Сайхансамбуу гишүүний “саваагүй чамин” зураг Б.Бат-Эрдэнэ гишүүний авсан зураг биш бөгөөд тэрхүү зургийг авсан хүнээс нь 20 сая төгрөгөөр худалдаж авах саналыг 9911....-тэнгүүдээс ирүүлсэн хэмээн хэвлэлээр цацагдаж байжээ.
24. МАН-ын бодлогоор 2012 оны сонгуульд Завхан аймгаас нэр дэвшихээр болсон ч бага хурлын гишүүд түүнийг дэмжээгүй. Тиймээс тэрээр тойроггүй болж, удахгүй УИХ-ын гишүүн гэх алдраасаа салж, эргээд бизнесмэн Ш.Сайхансамбуу болно.
/24tsag.mn/
