МАН-ын Удирдах зөвлөл болон Бага хурлын шийдвэрээр Дорноговь, Говьсүмбэр аймагт нэр дэвшихээр "Сод Монгол" компаний захирал Ц.Анандбазарыг Авлигатай тэмцэх газраас баасан гарагт баривчилсан. Энэ талаар АТГ болон МАН-ын зүгээс ямар нэгэн албан ёсны тайлбар хийгээгүй байгаа. Гэсэн ч МАН-ын Удирдах зөвлөлийн гишүүд өчигдөр өдөржин хуралдаж Ц.Анандбазарын оронд тус тойрогт өөр хүн нэр дэвшүүлэхээр болсон байна. Тэр нэр дэвшигч нь шинэ биш, харин 2008 онд Дорноговь, Говьсүмбэрийн тойргоос УИХ-д сонгогдон, дөрвөн жил парламентийн танхимд суусан Ж.Батсуурь аж.
   
  МАН-ын дуулиантай болсон Бага хурлын үеэр түүнийг заалнаас УИХ-ын сонгуульд дахин нэр дэвшүүлэх санал гарсан ч дэмжигдээгүй юм. Тэрбээр хуучин тойргоосоо гарах гэж нэлээд гүйсэн ч намын Удирдах зөвлөл шинэ хүн болох Ц.Анандбазарыг илүүд үзэж, сонгожээ. Гэвч Ц.Анандбазарыг АТГ-ынхан гэнэт баривчилсан билээ. Тиймээс сонгуулийн хугацаа тулчихаад байгаа тул дээрх тойрогт хоёрдугаарт бичигдэж байсан Ж.Батсуурь гишүүнийг УИХ-ын сонгуульд дахин нэр дэвшүүлэх дараагийн хувилбарыг сонгосон байна.

   Ж.Батсуурь нь 2000 онд Дорноговь аймгийн засаг даргаар томилогдон ажиллаж байсан. Чех улсын Братислав хотын Техникийн их сургуулийг барилгын инженер- эдийн засагч мэргэжлээр төгсчээ. Ямартаа ч МАН-ын нэр дэвшигчдийн жагсаалтанд АТГ-ын баривчилгаанаас болж өөрчлөлт орж байна.