Ардчилсан намын хүчтэй лидерүүдийн нэг УИХ-ын гишүүн Э.Бат-Үүл дахин парламентийн танхимд суухаас татгалзаж, НИТХ-д хүч үзэхээр болсон билээ. Түүнийг намынхан нь НИТХ-д өрсөлдөх хүмүүсийн нэрсийн жагсаалтын магнайд зүсэлсэн. Э.Бат-Үүл гишүүн ч энэ сонгуульд АН ялж, өөрөө хотын захирагч болж чадна гэдэгтээ итгэлтэй байгаагаа нуулгүй хэлж байсан. Тэгвэл цаг тулсан энэ үед түүнийг НИТХ-ын сонгуульд оролцуулахгүй байх магадлалтай гэх асуудал үүсч эхлээд байна.Шинээр нэмэлт, өөрчлөлт оруулсан УИХ болон НИТХ-ын сонгуулийн хуулинд төрийн албан хаагч сонгуульд нэр дэвших бол нэгдүгээр сарын нэгэн гэхэд ажлаа өгсөн байх тухай заасан билээ. Энэ дагуу олон агентлагийн дарга, төрийн албан хаагчид эрсдэл гарган ажлаа хүлээлгэж өгсөн. Тэгвэл Э.Бат-Үүл одоог хүртэл УИХ-ын гишүүн, төрийн албан хаагчийн статустай байгаа. Тиймээс түүнд НИТХ-ын сонгуульд оролцох эрх олгохгүй байх өндөр магадлал бий юм.
Э.Бат-Үүл баатарын хувьд УИХ-ын сонгуульд тойрогт нэр дэвшсэн бол найдвартай нэг суудал намдаа авчрах байсан. Намын жагсаалтанд дээгүүр бичигдэх боломж ч байлаа. Тиймээс хэрэв НИТХ-ын сонгуульд түүнийг оролцуулахгүй гэвэл Ардчилсан намын хувьд том гарз болно. Нийслэлийн засаг даргын суудлыг өнгөрсөн жилүүдэд дандаа МАН-ын хүмүүс авч байсан юм. Энэ байдлыг өөрчлөх ёстой, өөрчлөнө гэдгээ ч тэрбээр хэлж байсан. Гэтэл “нүүрээ угаасан” сонгуулийн тухай хуулийн шинэ заалт яах аргагүй түүний хөлийг тушаад байна. Хуулинд төрийн албан хаагч сонгуульд оролцохгүй гэж заасан байхад Э.Бат-Үүл УИХ-ын гишүүн хэвээрээ байгаад байдаг.
Энэ асуудлыг тэрбээр УИХ-ын гишүүний бүрэн эрх нь дуусаагүй байгаа тул хууль зөрчихгүй гэж тайлбарлаж байгаа юм. Хэрэв НИТХ-ын сонгуулийн Тойргийн хороо намайг энэ шалтгаанаар нэр дэвшигчээр бүртгэхгүй бол би шүүхэд хандана” гэж хэвлэлд ярилцлага өгөхдөө дурджээ. Хэрэв түүний “бүрэн эрхийн хугацаа нь дуусаагүй байгаа” гэсэн үндэслэлийг зөвд үзэх юм бол агентлагийн дарга, засаг даргаар ажиллах хугацаа нь дуусаагүй байхад ажлаа өгсөн хүмүүс яах вэ гэсэн асуудал ургаж байгаа аж. Хуулийнхан ийн тайлбарлаж байна. Харин Э.Бат-Үүл гишүүн өөр тайлбар хийж, НИТХ-ын сонгуульд намаа удирдан оролцох бат итгэлтэй байгаа аж.
Урьд нь ийм асуудал гарч байгаагүй тул ирэх өдрүүдэд сонгуулийн тухай хууль багагүй маргаан дэгдээх нь. Гурван жил дуншиж, гуравхан хоног хэлэлцсэн хуулийн сул тал эхнээсээ ажиглагдаж эхэллээ.
