Цагдаагийн байгууллага интернэт  залилангийн ноцтой хэргийг илрүүлжээ. Тухайлбал, бусдын цахим хаяг руу “Та азтан боллоо, Сугалаанд мөнгө хожлоо, 5000 ам.доллартай энэхүү дансыг та эзэмших эрхтэй боллоо” гэхчлэн захидал илгээж, улмаар энэхүү дансыг эзэмшихийн тулд, энэ мөнгийг авахын тулд та мөнгөний 5 хувийг бидэнд шилжүүлэх ёстой гэж тодорхой хэмжээний мөнгө шилжүүлэн авдаг байна. Мөн аж ахуйн нэгжүүдтэй шилжүүлгийн данс ажиллахгүй байгаа тул та энэ дансаар мөнгөө шилжүүлнэ үү гэхчлэн хүсэлт илгээж улмаар мөнгийг нь залилан авдаг аж. Энэ төрлийн гэмт хэргээс болж 27 аж ахуйн нэгж иргэнд 1.6 тэрбум төгрөгийн хохирол учруулсан хэргийг цагдаагийн байгууллага илрүүлэн ажиллаж байна.

Үүгээр зогсохгүй, цахим секс төрлийн гэмт хэрэгт 15 иргэнийг хохирогчоор тогтоон шалгаж байна.

Цаашлаад зохиогчийн эрхийг зөвшөөрөлгүй авсан 4, садар самууныг сурталчилсан 6 хэргийг шалгаж, зохиогчийн зөвшөөрөлгүйгээр цахим сайтад кино байрлуулсан 4 иргэнийг шалгаж байгаа аж. Тэдэнд Эрүүгийн хуулийн тусгай ангийг 140.1-т зааснаар хариуцлага тооцжээ. Садар самууныг сурталчилсан монголын 6 сайтыг хаасан бол гадаадаас хандах 35 сайтын хандалтыг хязгаарласан талаар албаны эх сурвалж мэдээллээ.

Д.Ундрах /24tsag.mn/