ЗГХЭГ-ын сайд, УИХ-ын гишүүн Ч.Хүрэлбаатар "Өглөөний сонин"-г шүүхэд өгчээ. Тэрбээр тус сонины 2012 оны 5 дугаар сарын 28-ны өдрийн  104 дугаарт, мөн  5 дугаар сарын 29-ний өдрийн 105 дугаарт гарсан нийтлэл нь түүний нэр хүндэд халдсан, гүжир гүтгэлэгийн шинжтэй нийтлэл гэж үзсэн байна. "Өглөөний сонин"-д “Увс аймгийн  Засаг дарга Э.Цасчихэрийг золиосонд гаргасан, Увс аймгийн Бөхмөрөн сумын Хотгор шанагын нүүрсний ордыг 11 сая ам.доллараар Солонгосын төрийн өмчит компани болох “Кореан Коал” компанид зарсан, тус ордыг стратегийн ач холбогдол бүхий орд газарт хамааруулахгүй байх бүхий л арга хэмжээг авч, улмаар улсын хөрөнгөөр хайгуул хийж тогтоосон нөөцийг дарсан"  гэх зэргээр бичсэн аж. Тиймээс "Миний тухай илт гүжирдлэгийн шинжтэй, бодит байдалд үл нийцсэн худал мэдээллийг хэвлэн нийтэлж, миний нэр төр, алдар хүнд, ажил хэргийн нэр хүндэд халдсан тул энэ асуудлыг шийдвэрлэж өгнө үү” гэсэн өргөдөл гаргасан байна. Харин "Өглөөний сонин" хариуд нь Ч.Хүрэлбаатар сайдыг авлига авсан хэмээн АТГ-т шалгуулахаар өгчээ.