Эх дэлхийн нөөцийг арвилан хамгаалах хөдөлгөөн идэвхжиж, бүх нийтийг эко дадал хэвшилд уриалж, энэ талаарх санаачилга гаргаж буй иргэн, байгууллага, хамт олныг БОАЖЯ-наас сайшааж, боломжтой хувилбаруудаар дэмжиж байгаа юм. Энэ удаад эко дадал хэвшилд хамт олноо, цаашлаад олон нийтийг хамруулан санаачилгатай ажиллаж буйг сайшаан, мөн БОАЖЯ-ны “Нээлттэй хаалганы өдөр”-ийн үйл ажиллагаанд идэвхтэй оролцсонд талархан Монгол дахь АНУ-ын ЭСЯ-нд БОАЖ-ын сайдын өргөмжлөл гардуулав.АНУ-ын төрийн Департаментаас “Дипломат ногоон санаачилга” урт хугацааны хөтөлбөр хэрэгжүүлж байгаа. Энэ санаачилгын хүрээнд Монгол дахь АНУ-ын ЭСЯ-ны ажилтнууд сайн дурын ногоон бүлгэмийг 2009 оноос хойш байгуулан ажиллаж байгаа юм. Өнгөрсөн хугацаанд АНУ-ын ЭСЯ-наас ногоон санаачилгынхаа хүрээнд цөөнгүй ажил хэрэгжүүлээд байна. Тухайлбал:
• - Өөрийн байгууллагын зүгээс байгальд учруулж буй нүүрсхүчлийн бохирдлын нөлөөллийн тооцоог гаргасан анхны ЭСЯ болсон
• - Хаягдал цуглуулж хоёрдогч түүхий эд боловсруулах үйлдвэрүүдэд нийлүүлдэг
• - ЭСЯ-ны байранд цахилгааны хэмнэлттэй гэрлийн шил ашиглах болсноор цахилгааны хэрэглээг 76%-иар бууруулсан
• - ЭСЯ-ны ойролцоо, Сэлбэ голын эрэг орчим болон Баянзүрх дүүргийн нутаг дэвсгэрт 150 мод тарьж, орчныг зүлэгжүүлэн арчилж ургуулсан
• - ЭСЯ-ны ажилтнууд болон гэр бүлийнхний экологийн боловсролд нэмэр болох зорилгоор байгальд ээлтэй байх зөвлөмжүүд тогтмол хүргэдэг.
Өнгөрсөн хугацаанд 6240 кг хаягдал цаас, 180 кг хуванцар цуглуулж тушаан, энэ орлогоороо нийт 136 ширхэг модны суулгац авч тарьж ургуулсан байна. Энэ үйл ажиллагаагаараа ЭСЯ-ны ажилтнууд “Өдөр бүрийг дэлхийн өдөр байлгая” хэмээн олон нийтэд уриалж байгаа юм.
Дээрх ажлуудыг хэрэгжүүлсний үр дүнд Төрийн Департаментаас харьяа агентлаг ЭСЯ-дад жил бүр олгодог “Дипломат ногоон санаачилга” (Green diplomacy initiative)-ын шагнал авсан хамгийн анхны ЭСЯ болж чадсан байна.
Үүнээс гадна Бүх нийтээр мод тарих өдрөөр тус ЭСЯ-ны хамт олон сонирхолтой төслүүд санаачлан ажиллаж, тарьсан модоо бүрэн арчилж ургуулсан юм. 2010 онд Бүх нийтээр мод тарих үндэсний өдрийг угтаж ЭСЯ-ны ногоон бүлгийнхэн “80 мод” төсөл хэрэгжүүлж, уг төслийн сан босгох хандивын үйл ажиллагаанд ЭСЯ-ны ажилтнууд болон байгаль орчноо хайрлан хамгаалагч иргэд байгууллагыг идэвхтэй хамруулсан байна. СТА дуучин Наран, дуучин Амина, “Гуа Үжин” бүжгийн клуб, “Эко элч” төрийн бус байгууллага, “Энхсайхан” сан, “Саунд оф Монголиа” компани, “Содон чимээ” хэлний сургалтын төв зэрэг байгууллага, иргэд төслийг дэмжиж оролцжээ. Эцэст нь Сэлбэ голын эрэгт 84 ширхэг зулзаган улиас мод тарьсан нь өнөөдөр бяцхан ногоон төгөл болон хотын орчинг чимэглэж байна. Харин 2011 оны мод тарих өдрөөр Баянзүрх дүүргийн 9-р хорооны нутаг дэвсгэрт 50 ширхэг улиас мод суулгаж ургуулж байна. Энэ оны 5-р сард ЭСЯ-ны ногоон бүлгийнхэн зам барилгын ажил хийгдэхээр төлөвлөсөн газарт ургаж байсан 40 ширхэг зулзаган модыг аварч, шилжүүлэн суулгасан.
Өнөөдөр БОАЖЯ-ны төлөөлөлтэй уулзах үеэрээ Монгол дахь АНУ-ын ЭСЯ-ны Эдийн засаг, байгаль орчны ажилтан Сьюзан Рассел “Манай ногоон бүлгийн гишүүдийн тоо жилээс жилд хүрээгээ тэлж байгаа, бид өдөр бүр байгаль дэлхийгээ хайрлаж хамгаалахад хувь нэмрээ оруулсаар байх болно” гэлээ.
